"Shkodra, djep i krimit - shkaktar i vetëm Edi Rama": Proteston opozita në Shqipëri

Kësaj radhe opozita në Shqipëri po proteston në Shkodër. Kjo protestë u thirr nga kryetari i Partisë Demokratike Sali Berisha, pasi në Shkodër u vranë Hamza Lici dhe Arlind Bushati, dhe një kalimtare e rastit, gjatë një atentati të ndodhur të mërkurën (30 tetor). Në tubimin e ditës së sotme kanë marrë pjesë qindra qytetarë, të cilët kanë “dënuar” ngjarjet kriminale të ndodhura në Shkodër. Ajo që vihet re është edhe një numër i lartë pankartash, të cilat protestuesit i kanë vendosur në ambiente të ndryshme të qytetit, raporton A2 CNN, transmeton Klankosova.tv. “Po na vrisni”, “qytetnimi asht ma i fortë se krimi”, “Benet, sa për sy e faqe nuk mund të reagosh moj Naçe”, “Shtet dhe krim është e barabartë me shkatërrim”, janë disa prej mesazheve të përcjella përmes pankartave. Kreu i grupit parlamentar të PD-së, Gazment Bardhi tha se “Shkodra nuk mund t’i nënshtrohet krimit”. Kjo është protesta e tretë e opozitës, si pjesë e aksionit opozitar të “mosbindjes civile”. Deputeti i PD-së Flamur Noka, tha se Shkodra sot “është" "djepi” i krimit të organizuar, dhe se “shkaktari i vetëm" "është” kryeministri shqiptar Edi Rama dhe rilindja. Ai akuzoi policinë për lidhje me krimin edhe u bëri thirrje qytetarëve të ngrihet kundër regjimit.