Shkodër: Arrestohet 19-vjeçari, kapen rreth 165 mijë € të dyshuara të falsifikuara dhe municion luftarak

Sektori për Hetimin e Krimeve të Rënda, nën drejtimin e Prokurorisë, në bashkëpunim me Seksionin për Hetimin e Krimeve Ekonomiko-Financiare dhe Komisariatin e Policisë Shkodër, me mbështetjen e Sektorit të Forcës së Posaçme “Shqiponja” dhe Forcës Kombëtare të Sigurisë, Njësia Shkodër, kanë finalizuar operacionin e koduar “Livadhet 3”, si rezultat i kontrolleve të kryera në zbatim të vendimit të Gjykatës së Shkodrës. Në kuadër të operacionit është vënë në pranga shtetasi O. Ç., 19 vjeç, banues në Shkodër. Siç njofton Policia e Shtetit, gjatë kontrolleve të kryera në banesat e disa shtetasve të dyshuar për veprat penale “Vjedhja” dhe “Mbajtja pa leje dhe prodhimi i armëve, armëve shpërthyese dhe i municionit”, të lidhura edhe me dy operacionet e mëparshme “Livadhet 1” dhe “Livadhet 2”, shërbimet e Policisë gjetën dhe sekuestruan në banesën e 19-vjeçarit: 164 300 euro të dyshuara të falsifikuara, municion luftarak, 8 celularë, një sasi lënde djegëse, një automjet të dyshuar të vjedhur në Fushë-Krujë në vitin 2019, si dhe dy targa të dyshuara të vjedhura në Tiranë në vitin 2025. /Klankosova.tv