Shekerinska: NATO e gatshme të blejë armatim nga fabrikat në rajon – tregohuni të zgjuar

Vendet e Ballkanit Perëndimor tani kanë mundësinë të bëhen një partner i rëndësishëm mbi të cilin mbështetet NATO, pasi udhëheqësit e shteteve anëtare të Aleancës konfirmuan gatishmërinë e tyre për shpenzime më të mëdha për mbrojtjen në samitin në Hagë, përfshirë blerjen e sasive të mëdha të municioneve dhe pajisjeve të tjera ushtarake të prodhuara nga fabrikat në rajon. Kjo u konfirmua nga Zëvendëssekretarja e Përgjithshme e NATO-s, Radmila Shekerinska, e cila i tha gazetës “Oslobodjenje” të Sarajevës se samiti në Hagë i dërgoi një mesazh të rëndësishëm rajonit që vendet e tij duhet ta shqyrtojnë me kujdes. “Vendet partnere të NATO-s në rajonin e Ballkanit Perëndimor kanë një industri shumë të zhvilluar mbrojtëse. Dhe kjo është një mundësi edhe për ta, sepse, siç e kemi parë në të kaluarën, industria mbrojtëse e anëtarëve të NATO-s ndonjëherë nuk mund të prodhojë sasi të mjaftueshme armësh. Nëse disa nga partnerët tanë janë të zgjuar, të shpejtë dhe me cilësi të lartë, kjo do të jetë një mundësi për ta për të krijuar vende të reja pune dhe bashkëpunim shtesë”, tha Shekerinska, transmeton Klankosova.tv. Ajo shpjegoi se në këtë drejtim do të ketë një lidhje të drejtpërdrejtë midis NATO-s dhe shteteve partnere, të tilla si Kosova, Bosnja dhe Hercegovina dhe Serbia, të cilat janë të vetmet në rajon formalisht jashtë NATO-s. /Klankosova.tv