Lajmet e fundit
Kreu i Hezbollahut, Naim Qassem, u zotua të premten të koordinohet ngushtë me ushtrinë libaneze për të zbatuar një marrëveshje armëpushimi me Izraelin, për të cilën ai tha se grupi i tij kishte rënë dakord.
Ishte fjalimi i tij i parë që nga hyrja në fuqi e armëpushimit të mërkurën, pas më shumë se një viti lufte mes Hezbollahut dhe Izraelit që shkatërruan pjesë të Libanit dhe vranë 4,000 njerëz, duke përfshirë qindra gra dhe fëmijë.
Qassem tha se Hezbollahu "e kishte miratuar marrëveshjen, me rezistencën e fortë që kishte treguar në fushë betejë".
Armëpushimi përcakton se Hezbollahu do të tërhiqet nga zonat në jug të lumit Litani, i cili kalon rreth 30 kilometra në veri të kufirit me Izraelin, dhe se ushtria libaneze do të vendosë trupa atje ndërsa trupat tokësore izraelite tërhiqen.
"Do të ketë një koordinim të nivelit të lartë midis Hezbollahut dhe ushtrisë libaneze për të zbatuar angazhimet e marrëveshjes", tha Qassem, shkruan Reuters, transmeton Klankosova.tv.
Ushtria libaneze ka dërguar tashmë trupa shtesë në jug, por po përgatit një plan të detajuar të vendosjes.
Kjo përpjekje është komplikuar nga prania e vazhdueshme e trupave izraelite në territorin libanez. Marrëveshja u jep atyre 60 ditë të plota për të përfunduar tërheqjen e tyre.
Ushtria izraelite ka lëshuar kufizime për njerëzit që kthehen në fshatrat përgjatë kufirit të Libanit me Izraelin dhe ka qëlluar mbi njerëzit në ato fshatra ditët e fundit, duke i quajtur këto lëvizje shkelje të armëpushimit.
