Shefi i FBI-së thotë se TikTok-u është shqetësim për sigurinë kombëtare të SHBA-së

Qeveria e Kinës mund ta përdorë TikTok-un për të kontrolluar të dhënat e miliona përdoruesve amerikanë, tha drejtori i FBI-së, Christopher Wray në një seancë dëgjimore të Senatit të SHBA-së të mërkurën, duke shtuar se aplikacioni me video në pronësi kineze "bërtet" shqetësime sigurie, raporton Reuters, transmeton Klan Kosova. Wray tha në një seancë dëgjimore të Komitetit të Inteligjencës së Senatit mbi kërcënimet mbarëbotërore ndaj sigurisë së SHBA-së se qeveria kineze mund ta përdorë gjithashtu TikTok-un për të kontrolluar softuerin në miliona pajisje dhe për të nxitur narrativat për të ndarë amerikanët mbi Tajvanin ose çështje të tjera. "Ky është një mjet që në fund të fundit është nën kontrollin e qeverisë kineze - dhe për mua, ai “bërtet” me shqetësime të sigurisë kombëtare", tha Wray. Shtëpia e Bardhë mbështeti legjislacionin e prezantuar të martën nga një duzinë senatorësh për t'i dhënë administratës së Joe Biden kompetenca të reja për të ndaluar TikTok-un dhe teknologji të tjera me bazë të huaja nëse ato paraqesin kërcënime për sigurinë kombëtare. Miratimi nxiti përpjekjet e një numri ligjvënësish për të ndaluar aplikacionin popullor, i cili është në pronësi të kompanisë kineze ByteDance dhe përdoret nga më shumë se 100 milionë amerikanë. Zyrtarë të tjerë të lartë të inteligjencës amerikane, duke përfshirë Drejtorin e Inteligjencës Kombëtare, Avril Haines, drejtorin e CIA-s, William Burns dhe drejtorin e Agjencisë Kombëtare të Sigurisë, Paul Nakasone, ranë dakord në seancën se TikTok-u përbënte një kërcënim për sigurinë kombëtare të SHBA. Nakasone të martën shprehu shqetësim gjatë dëshmisë së Senatit për mbledhjen e të dhënave të TikTok-ut dhe potencialin për të lehtësuar operacionet me ndikim të gjerë. *Klikoni KËTU për t’u bërë pjesë e kanalit zyrtar të Klan Kosovës në Viber. *Klikoni KËTU për ta shkarkuar aplikacionin e Klan Kosovës në Android, dhe KËTU për iOS.