ShBA: Rastet e Gjykatës Speciale ndihmojnë në ndërtimin e një shteti të së drejtës

Rastet që po i gjykojnë Dhomat e Specializuara të Kosovës (DhSK) në Hagë, kanë të bëjnë me ndërtimin e një shteti të së drejtës dhe një sistemi të pavarur gjyqësor. Kështu u shpreh Ambasadorja amerikane për Drejtësinë Penale Globale, Beth Van Schaack, gjatë një bashkëbisedimi me gazetarë. “Është jashtëzakonisht e rëndësishme që ne të vazhdojmë ta mbështesim atë institucion si komunitet ndërkombëtar. Është duke gjykuar krimet nga lufta në Kosovë, por po ashtu po kontribuon në vendosjen e shtetit të së drejtës brenda Kosovës. Dhe kështu ne po bëjmë gjithçka që mundemi për të mbështetur atë institucion ndërsa ai vazhdon punën e tij. Është një rast i madh që po ecën përpara, i cili përfshin ish-kreun e shtetit, por ka edhe një sërë rastesh të tjera, duke përfshirë çështjet që përfshijnë përpjekje për të minuar administrimin e drejtësisë. Dhe kjo përfshin rastet që përfshijnë ngatërrimet e mundshme me dëshmitarë ose frikësimin e dëshmitarëve. Dhe kështu këto raste janë po aq të rëndësishme, sepse ato kanë të bëjnë me ndërtimin e një shteti të së drejtës dhe një sistemi gjyqësor që është në gjendje të funksionojë pa iu nënshtruar presionit të jashtëm nga individë apo subjekte që nuk do të donin t'i shihnin këto çështje të ecin përpara”, tha Ambasadorja Van Schaack kur u pyet nga gazetarët, raporton Klankosova.tv. Ajo tha se ShBA-ja ka qenë prej kohësh përkrahëse e Dhomave të Specializuara të Kosovës, “e cila në thelb është një gjykatë kosovare, por e bazuar jashtë territorit në Hagë dhe përfiton nga një model hibrid, ku një numër i ekspertëve ndërkombëtarë janë duke shërbyer në pozita kyçe në atë institucion”. Po ashtu, Ambasadorja Van Schaack tha se vendi i saj e ka dërguar kryeprokuroren Kim West në DhSK. “Ne e kemi dërguar atë, në thelb, për të mbështetur punën e Dhomave të Specializuara të Kosovës”, potencoi Ambasadorja amerikane për Drejtësinë Penale Globale, Beth Van Schaack. /Klankosova.tv