Lajmet e fundit
Shtetet e Bashkuara u kanë kërkuar vendeve të tjera përmes kanaleve diplomatike që t'i thonë Iranit se përshkallëzimi në Lindjen e Mesme nuk është në interesin e tyre, tha të hënën një zëdhënës i Departamentit të Shtetit.
Sekretari amerikan i Shtetit Antony Blinken, gjendjen e ka quajtur një “moment kritik” për rajonin, raporton Reuters, transmeton Klankosova.tv.
Ai tha se Washingtoni ishte "i angazhuar në diplomaci intensive, pothuajse gjatë gjithë kohës" për të ndihmuar në qetësimin e tensioneve mes frikës se Irani po përgatit një sulm hakmarrës kundër Izraelit.
"Të gjitha palët duhet të përmbahen nga përshkallëzimi", tha Blinkeni gjatë një ceremonie nënshkrimi me homologun e tij australian në Washington.
"Të gjitha palët duhet të ndërmarrin hapa për të lehtësuar tensionet. Përshkallëzimi nuk është në interesin e askujt. Ai do të çojë vetëm në më shumë konflikte, më shumë dhunë, më shumë pasiguri".
Udhëheqësi i Hamasit Ismail Haniyeh, u vra në kryeqytetin iranian Teheran javën e kaluar, një sulm që tërhoqi kërcënime për hakmarrje ndaj Izraelit dhe nxiti shqetësime të mëtejshme se konflikti në Gaza po shndërrohej në një luftë më të gjerë në Lindjen e Mesme.
Irani ka fajësuar Izraelin dhe ka thënë se ai duhet “dënuar". Zyrtarët izraelitë nuk kanë marrë përgjegjësinë për vrasjen.
