Sekretet e Bibliotekës Kombëtare: Miloti sjellë historinë e kupolave, librin për Skënderbeun dhe zyrën ovale (VIDEO)

Biblioteka Kombëtare e Kosovës konsiderohet si një nga objektet më unike jo vetëm në vend - magjike për çdo vizitor dhe simbol i identitetit tonë kulturor. Gjithçka nisi më 12 gusht 1974, kur u hodhën themelet e një ëndrre. Tetë vite punë të pandërprerë, 42 kompani të angazhuara, qindra duar që punuan ditë e natë — për ta ngritur këtë objekt monumental. Ashtu si çdo krijim i madh arkitektonik, edhe kjo ndërtesë ka kaluar mes lavdërimeve dhe kritikave. Por një gjë ka qenë thelbësore: arkitekti i njohur Bashkim Fehmiu kishte vetëm një kërkesë për arkitektin Andrija Mutnjaković: “Të mos kursehet në materialin që do të përdoret”. Kështu ka treguar Blerina Rogova Gaxha, drejtuese e Bibliotekës. Të gjitha materialet, përveç kupolave, janë nga trojet e Kosovës, ndërsa punimet u kryen nga kompanitë e njohura “Ramiz Sadiku” dhe “Tefik Çanga”. Sot, Biblioteka ruan afro 2 milionë libra — dy milionë histori, dy milionë jetë dhe miliona frymë që kanë lexuar e lënë gjurmë. Mes tyre, ndodhet edhe një libër për Skënderbeun, i cili daton nga vitet 1500 dhe ruhet me shumë kujdes brenda trezorit të këtij objekti. Arkitekti kroat Andrija Mutnjaković u frymëzua nga trashëgimia shqiptare e mesjetës, nga ornamentet, gjeometria, guri dhe struktura tradicionale. Ky frymëzim e shndërroi Bibliotekën në një simbol të veçantë të identitetit arkitektonik shqiptar. A janë kupolat plisa shqiptarë? A e dini se jo vetëm presidenti i SHBA-së ka një zyrë ovale? Një dhomë që rrallëherë i shfaqet publikut dhe shumë përgjigje tjera, në reportazhin e Milot Hasimjës, në Krejt Kapak me Milotin, në Klan Kosova. https://www.youtube.com/watch?v=A-phzCYoEzY