Lajmet e fundit
Ka përfunduar seanca e jashtëzakonshme e Kuvendit të Kosovës, në të cilën në rend dite ishin pesë pika për shqyrtim.
Gjatë kësaj seance, nuk ka kaluar propozimi i Lëvizjes Vetëvendosje për shmangie nga afatet procedurale për rishikimin e Ligjit për Buxhetin 2026. Mocioni mori 58 vota për, 48 kundër dhe një abstenim.
Po ashtu, Kuvendi nuk miratoi shmangien nga afati procedural për Projektligjin për Parandalimin e Pastrimit të Parave dhe Luftimin e Financimit të Terrorizmit, me 58 vota për, 48 kundër dhe 3 abstenime.
Nuk kaloi as mocioni për shmangie nga afatet e rregullta për Projektligjin për Energjinë Elektrike, i cili mori 61 vota për, 48 kundër dhe një abstenim.
Ndërkohë, në shqyrtim të parë, Projektligji nr.10/L-031 për Energjinë është miratuar në parim me 58 vota për dhe 15 kundër.
Gjithashtu, nuk ka kaluar as mocioni procedural për Byronë Shtetërore për Verifikimin dhe Konfiskimin e Pasurisë së Pajustifikueshme, pavarësisht se mori 62 vota për dhe 48 kundër, pasi nuk arriti shumicën e nevojshme për shmangie nga procedurat e rregullta. /Klankosova.tv
