Sa është i kushtueshëm sporti i shahut? Flet Saraçi, kampioni i shumëfishtë i Kosovës

Shahisti dhjetë herë kampion i Kosovës, Nderim Saraçi ka dhënë detaje se sa i kushtueshëm është sporti i shahut. “Sportet individuale janë shumë të lira se sportet ekipore, edhe në shah po besoj prej sporteve të tjera nuk nevojitet investim shumë i madh, por normalisht dallon para 20 viteve që është punuar vetëm me libra tash normalisht punohet me kompjuter, dhe kërkohet një kompjuter shumë i fortë për të punuar sepse ato programe që futen në të duhet të jetë në gjendje të fortë për t’i përballuar”, ka thënë Saraçi në Sport Show të Klan Kosovës Ai po ashtu ka folur rreth fitoreve të tij, dhe vështirësive qe ka hasur. “Nuk është aspak e lehtë, sidomos kur bëhesh disa vite me radhë kampion, se secilën herë ndoshta ke mundësi me i nënvlerësuar kundërshtarët sepse mendon se ke me fituar më herët se vitet e tjera, mirëpo as këtë vit nuk ka qenë aspak e lehtë edhe pse unë kam arrit të gjitha fitoret me i shënuar deri në fund, pas nëntë xhirove i kam pasur nëntë fitore. Për mua ka qenë shumë me rëndësi ta fitojë këtë vit”, është shprehur Saraçi. Më tutje ai shpjegoi më specifikisht lojën e shahut dhe kategoritë e tij. “Gara kryesore është ajo standard, por që dy vitet e fundit kanë filluar të mbahen edhe blic dhe rapid, po e quajnë si festival i shahut edhe aty kam arrit të shpallem kampion, mirëpo kjo është gara kryesore që jam kampion që dhjetë vite, nga viti 2013. Përjashtim bën viti 2020 pasi ka qenë pandemia dhe nuk kam marrë pjesë”, tha Saraçi. Për më tepër, ai është deklaruar se sipas vlerësimeve, ai dominon në kategorinë blic të shahut.