Lajmet e fundit
Rusia nisi një valë sulmesh me raketa dhe dronë të hënën në disa rajone të Ukrainës, pasi temperaturat e ftohta goditën banorët ukrainas.
Ukrainasit e nisën javën e tyre të fshehur në strehimore dhe alarmet ajrore u aktivizuan në të gjithë vendin pasi Rusia sulmoi disa qytete të Ukrainës, duke lënë katër të vdekur dhe 38 të plagosur, sipas zyrtarëve ukrainas.
Rusia lëshoi më shumë se 50 raketa të llojeve të ndryshme dhe tetë drone Shahed të prodhuar nga Irani. Forcat Ajrore të Ukrainës përgjuan të gjitha sulmet me dronë dhe 18 nga raketat e lundrimit, sipas Ministrisë së Mbrojtjes së Ukrainës.
Ministria e Mbrojtjes e Rusisë thotë se Forcat e Armatosura nisën sulme "me precizion të lartë të armëve me bazë detare dhe ajrore me rreze të gjatë veprimi" në "objektet e kompleksit ushtarako-industrial" të Ukrainës.
Sulmet e së hënës shënjestruan disa zona civile, duke përfshirë ndërtesa banimi dhe një qendër tregtare, në të gjithë rajonet Zaporizhzhia, Khmelnytskyi, Dnipropetrovsk dhe Kharkiv të Ukrainës. Sipas guvernatorit të rajonit të Kharkiv, Oleh Syniehubov, sulmi i Rusisë dëmtoi një ndërmarrje dhe një institucion arsimor.
Fotot dhe videot tregojnë shpëtimtarët duke nxjerrë trupat e viktimave nga nën rrënoja. Një grua e moshuar që u shpëtua nga mbetjet e shtëpisë së saj vdiq në qytetin e Zmiiv, tha guvernatori Syniehubov. Ekipet e shpëtimit kaluan mëngjesin e së hënës duke pastruar lagjet e tyre.
Sulmi vjen ndërsa një front i ftohtë godet Ukrainën. Oleksandr Vilkul, kreu i Administratës Ushtarake të qytetit qendror të Ukrainës, Kryvyi Rih, tha të hënën se rreth 15,000 banorë janë pa energji elektrike dhe tramvajet lokalë nuk funksionojnë. Një grua 62-vjeçare vdiq në Kryvyi Rih të hënën mes një serie sulmesh me nëntë raketa ruse dhe një qendër tregtare dhe shtëpi banimi u dëmtuan.
Në rajonin e pushtuar nga Rusia në Luhansk, një avion rus aksidentalisht hodhi një bombë mbi një lagje banimi në qytetin Rubizhne, sipas Guvernatorit të Oblastit të Luhanskut, Artem Lysogor.
"Okupatorët nga aviacioni goditën ndërtesat e larta të mbijetuara në Rubizhny - për shkak të numrit të madh të dëshmitarëve, nuk ishte e mundur të fshihej ngjarja", tha Lysogor, shkruan Reuters, transmeton Klankosova.tv.
