Lajmet e fundit
Rusia lëshoi të enjten sulmin e saj të dytë të madh në infrastrukturën energjetike të Ukrainës këtë muaj, duke shkaktuar ndërprerje të shumta të energjisë elektrike në të gjithë vendin.
Presidenti Vladimir Putin tha se Moska kishte goditur Ukrainën si përgjigje ndaj sulmeve të Ukrainës në territorin rus me raketa të SHBA-së, ATACMS me rreze të mesme veprimi. Ai tha se objektivat e ardhshme të Rusisë mund të jenë "qendra vendimmarrëse" në Kiev.
Presidenti ukrainas Volodymyr Zelensky akuzoi Rusinë për një "përshkallëzim të neveritshëm", duke thënë se ajo kishte përdorur raketa lundrimi me municione thërrmuese.
Më vonë në fjalimin e tij, Zelensky tha se po fliste me liderët perëndimorë, duke përfshirë sekretarin e përgjithshëm të NATO-s, Mark Rutte, kryeministrin britanik Keir Starmer dhe kancelarin gjerman Olaf Scholz, për të krijuar një përgjigje ndaj "përpjekjes së Rusisë për ta bërë situatën më të padurueshme".
"Tani është koha për të forcuar pozicionet tona - pozicionin e Ukrainës dhe partnerëve tanë", tha ai.
Presidenti i ShBA-së, Joe Biden, e dënoi sulmin rus duke e quajtur si "të egër".
Forcat ajrore të Ukrainës thanë se Rusia përdori 91 raketa dhe 97 dronë në sulmin e së enjtes. Tutje, thanë se 12 prej tyre ishin goditur, shumica e të cilave ishin objekte të energjisë dhe karburantit, shkruan Reuters, transmeton Klankosova.tv.
