Rubio në Izrael teksa IDF-i shkatërroi më shumë ndërtesa në qytetin e Gazës

Kryeministri i Izraelit, Benjamin Netanyahu, ka thënë se marrëdhëniet ShBA-Izrael "nuk kanë qenë kurrë më të forta", ndërsa sekretari i Shtetit i ShBA-së, Marco Rubio, viziton Gazën për të diskutuar për luftën atje pas sulmit të Izraelit ndaj anëtarëve të Hamasit në Katar. Ai u tha gazetarëve se marrëdhënia ishte po aq e fortë dhe "e qëndrueshme sa gurët në Murin Perëndimor", ndërsa ndodhej në vendin e shenjtë në Jerusalem të dielën. Më parë, Rubio tha se presidenti i ShBA-së, Donald Trump, ishte i pakënaqur me sulmin izraelit ndaj aleatit kryesor të ShBA-së, por theksoi se marrëdhënia ShBA-Izrael ishte "shumë e fortë". Vizita e tij vjen ndërsa forcat izraelite vazhdojnë të shkatërrojnë ndërtesa banimi në qytetin e Gazës, duke detyruar mijëra njerëz të largohen përpara një ofensive tokësore të pritur për të pushtuar qytetin. "Sigurisht që nuk jemi të lumtur për këtë, presidenti nuk ishte i lumtur për këtë. Tani duhet të ecim përpara dhe të kuptojmë se çfarë do të ndodhë më pas", tha Rubio para se të nisej për në Izrael. Në fjalimin e tij në Bazën e Përbashkët Andreës, Rubio shtoi se përparësia e Trump mbeti kthimi i të gjithë pengjeve dhe fundi i luftës. Anëtarët e Hamasit kishin qenë në Doha për të diskutuar propozimin e fundit të SHBA-së për një armëpushim në Gaza kur Izraeli nisi sulmet e tij. Kur u pyet nëse sulmi në Doha e ndërlikoi gatishmërinë e Katarit për të punuar me ShBA-në, Rubio tha se "ata kanë qenë partnerë të mirë në një numër frontesh". Katari - një aleat kyç i ShBA-së në rajon dhe vendndodhja e një baze të madhe ajrore amerikane - do të presë një samit urgjent arabo-islamik të hënën për të diskutuar hapat e mëtejshëm. Doha e ka dënuar sulmin e Izraelit si "frikacak" dhe një "shkelje flagrante të ligjit ndërkombëtar", shkruan BBC, transmeton Klankosova.tv.