Rizvanolli: Marrëveshja me MCC-në është gurthemel i tranzicionit tonë energjetik (VIDEO)

Ministrja e Ekonomisë, Artane Rizvanolli, vlerëson se marrëveshja me Korporatën e Sfidave të Mijëvjeçarit (MCC) vendos edhe gurthemelin e tranzicionit energjetik në Kosovë. Rizvanolli, në Rubikon në Klan Kosova, e vlerëson lartë marrëveshjen me MCC-në për faktin se efiçienca energjetike dhe energjia e ripërtërishme janë shtyllat kryesore të strategjisë energjetike për dekadën e ardhshme, njofton Klankosova.tv. “Ky është projekti më inovativ në vendin tonë, por edhe në rajon do të thosha dhe është gjithashtu shumë e përshtatshme që partneri ynë kryesor dhe aleati ynë SHBA-ja është duke na ndihmuar në këtë program, i cili është gjithashtu gurthemeli i tranzicionit tonë energjetik. Unë jam shumë mirënjohëse dhe e vlerësoj shumë, jo vetëm mbështetjen e MCC-së, por edhe faktin se MCC-ja e vendos fokusin kryesor në pronësinë e shtetit dhe mendoj se kjo vërtet duhet të nënvizohet dhe është shumë e rëndësishme, sepse kjo nënkupton se programet që i dizajnon MCC-ja në bashkëpunim me shtetet kontribuojnë në strategjinë afatgjatë dhe prioritetet e politikave tona. Efiçienca energjetike dhe energjia e ripërtërishme janë shtyllat kryesore të strategjisë sonë energjetike për dekadën e ardhshme, prandaj të dyja programet e MCC-së, përputhen në mënyrë perfekte me politikat tona”, ka thënë Rizvanolli, njofton Klan Kosova. “Në njërën anë, programi Threshold ofron modele shumë të rëndësishme për masat për energjinë eficiente në të ardhmen për sektorin e banimit dhe në anën tjetër programi Kompakt na e mundëson që në mënyrë substanciale të rrisim gjenerimin dhe integrimin e energjisë së ripërtërishme solare dhe me erë në sistemin tonë”. Tutje, ministrja tha se përtej sistemit të energjisë, fuqizimi i grave dhe zhvillimi i aftësive për tregun dhe mundësitë e punësimit për të rinjtë janë aspektet e mira nga marrëveshja me MCC-në dhe mezi presin që të implementojnë programin. “Dy aspekte shtesë të këtij programi që mund të kalojnë pa u vërejtur, si fuqizimi i grave dhe zhvillimi i aftësive që janë të rëndësishme për tregun dhe mundësi punësimi për të rinjtë janë shumë të rëndësishme për ne. Shoqëria gjithëpërfshirëse dhe e drejtë janë në qendër të agjendës sonë qeverisëse dhe ka gjithashtu tema që i kam për zemër, prandaj unë dhe e tërë qeveria jemi shumë të ekzaltuar për programin dhe mezi presim të vazhdojmë ta udhëheqim programin dhe ta implementojmë në mënyrën më të mirë të mundshme dhe në periudhën më të shkurtë kohore të mundshme”, tha Rizvanolli. https://www.youtube.com/watch?v=Km6i2jv4t_I