Rinumërohen 13 nga 35 vendvotime në Vushtrri, procesi vazhdon

Në Qendren e Numërimit dhe Rezultateve janë numëruar 13 nga 50 vendvotime. Procesi i rinumërimit po vazhdon. Kështu deklaroi për Klankosova.tv Valmir Elezi, zëdhënës i Komisionit Qendror të Zgjedhjeve. "Sipas të dhënave, deri në përfundim të ditës së hënë janë rinumëruar 13 vendvotime nga 50 sa është numri i përgjithshëm i tyre për të cilat ka marrë vendim KQZ. Vendvotimet e rinumëruara deri më tani i takojnë komunës së Vushtrrisë", tha Elezi. Ai theksoi se edhe gjatë ditës së sotme do të procedohet me rinumërimin edhe të vendvotimeve të tjera. Elezi theksoi se në mbledhjen e mbajtur më 10 mars, Komisioni Qendror i Zgjedhjeve mori dy vendime për rinumërimin e 50 vendvotimve. "Fillimisht, KQZ mori vendim për rinumërimin e 15 vendvotimeve nga komuna të ndryshme të Kosovës, në të cilat është zhvilluar procesi i votimit më 9 shkurt 2025. Sipas rekomandimit të prezantuar nga Qendra e Numërimit dhe Rezultateve, gjatë pranimit të rezultateve në këtë qendër nga Qendrat Komunale të Numërimit është hasur në mospërputhje të numrit të nënshkrimeve në Listën e Votuesve me numrin e fletëvotimeve brenda në kutitë e votimit të këtyre vendvotimeve", theksoi ai. "Në vazhdim, KQZ mori vendim për rinumërimin e plotë të fletëvotimeve për subjektet politike dhe kandidatët nga 35 vendvotime për shkak se ekzistojnë mospërputhje në rezultate. Këto vendvotime i takojnë komunës së Vushtrrisë në të cilat është votuar më 9 shkurt 2025". "Procesi i rinumërimit po zhvillohet në prezencë të vëzhguesve të akredituar", deklaroi në fund zëdhënësi i KQZ-së Valmir Elezi./ Klankosova.tv