Reuters: Tranzicioni i sektorit të energjisë Kosovës do t’i kushtojë 4.5 miliardë euro

Mediumi i njohur Reuters, i ka kushtuar një artikull rritjes së çmimit të energjisë elektrike në Evropë, në mesin e tyre edhe Kosova. Në këtë artikull thuhet se tranzicioni energjetik i Kosovës, për eliminimin e përdorimit të qymyrit deri në vitin 2050, do t'i kushtojë Kosovës hiç më pak se 4.5 miliardë euro, një shifër kjo goxha e frikshme për ekonominë e vendit. Aty theksohet se Kosova po mundohet që ta arrijë hapin me pjesën tjetër të Evropës, duke instaluar shumë burime të rinovueshme. Në dhjetor, Kosova nisi një ankand për të instaluar 100 Mega Wat kapacitet të erës. Por, Banka Botërore vlerëson se asaj i nevojiten 100 herë më shumë - të paktën 10 gigavat kapacitet të ri, shkruan Reuters transmeton Klankosova.tv Kosova ditëve të fundit u ballafaqua me një krizë të madhe të furnizimit me rrymë. Në disa zona reduktime shkuan madje edhe me dhjetëra orë. Një nga vendet që po përballet me rritjen e energjisë elektrike është edhe Greqia. Kjo po krijon vazhdimisht vështirësi edhe tek bizneset atje. Pronari i një restoranti në Athinë, deklaroi se tani ai do të duhet të paguajë edhe një “qira të dytë”. Christos Kapetanakis, deklaroi se faturat e larta të energjisë elektrike ulin fitimet dhe e detyrojnë atë të rrisë çmimet. Ai tha se paguan midis 3 mijë dhe 3 mijë e 800 euro (3,083-3,905 dollarë) në muaj për energji elektrike, 40% më shumë që kur Rusia pushtoi Ukrainën në vitin 2022 dhe shkaktoi një krizë energjetike evropiane. Energjia elektrike dikur përbënte 3 për qind të qarkullimit mujor dhe tani është më shumë se 15 për qind, tha ai. "Rritja e vazhdueshme e çmimeve, veçanërisht në sektorin e turizmit...do ta bëjë Greqinë të bëhet më pak konkurruese në krahasim me vendet e tjera të Mesdheut," tha ai nga restoranti i tij në lagjen historike Plaka. Gjendja e tij e vështirë ka bërë jehonë në të gjithë kontinentin që kur lufta në Ukrainë ndërpreu furnizimet e gazit rus në Evropë dhe detyroi vende si Greqia të kërkonin alternativa më të shtrenjta. Por, Evropa Juglindore e ka ndjerë ndikimin shumë më tepër sesa veriperëndimi. Ekspertët thonë se kjo do të zgjerohet vetëm me goditjen e dimrit dhe do të ketë një efekt negativ në rritjen ekonomike. Energjia me shumicë në Greqi dhe Itali në gusht ishte 12 herë më e lartë se në vendet nordike dhe madje i zbehte vendet e tjera të Evropës Jugore që po përjetonin mot të nxehtë.