Lajmet e fundit
Kandidati për deputet i PDK-së, Nait Hasani ka reaguar pasi gjatë rinumërimit të votave, ai doli në minus për mbi 3000 vota.
Përmes një reagimi publik në llogarinë e tij në Facebook, Hasani thotë se votat e tij u rritën në mënyrë të padrejtë, transmeton Klankosova.tv.
“Në zgjedhjet parlamentare të 28 dhjetorit 2025 është cenuar rëndë vullneti i lirë i qytetarëve dhe është sulmuar drejtpërdrejt dinjiteti im politik dhe kombëtar. Me atë që pash në rinumërim, votat e mia janë rritur në mënyrë të padrejtë, duke u përdorur emri im për manipulime të papranueshme zgjedhore. Ky veprim përbën jo vetëm shkelje ligjore, por edhe akt të rëndë moral dhe politik”, ka shkruar ai.
Pos tjerash, Hasani tha se refuzon kategorikisht çdo votë që nuk buron nga vullneti i lirë i qytetarit.
“Nuk kam hyrë në politikë për të fituar me mashtrime, por për të fituar me besim. Nuk kam nevojë për vota të vjedhura, sepse respektoj votën e ndershme më shumë se çdo rezultat. Drejtësia nuk duhet të heshtë. As unë nuk do të hesht”, tha Hasani.
Lidhur me këtë reagim, Hasani thotë se nuk është për ta mbrojtur emrin e tij, por për të mbrojtur të ardhmen demokratike të Kosovës.
“Unë do të vazhdoj të qëndroj në anën e qytetarëve, në anën e votës së lirë dhe në anën e së vërtetës, edhe nëse kjo rrugë është më e vështirë. Ky reagim nuk është për të mbrojtur vetëm emrin tim, por për të mbrojtur të ardhmen demokratike të Kosovës”.
