Raportohet se është arrestuar Gjorgje Radomiroviq, i dyshuar për një vrasje në Kosovë

Raportohet se është arrestuar në Serbi, Gjorgje Radomiroviq, i cili më 7 gusht të këtij viti ishte arratisur nga Burgu i Mitrovicës së Veriut. Ai ishte shpallur në kërkim ndërkombëtar për kryerjen e disa veprave penale, përfshirë edhe një vrasje të cilën dyshohet se e ka kryer në Kosovë, raporton Klankosova.tv. 34 vjeçari u arrestua në zonën e Novi Pazarit në Serbi, shkruajnë mediat serbe, transmeton Klankosova.tv. Radomiroviq thuhet se ka lidhje edhe me disa grabitje të kryera në këtë zonë, përfshirë edhe grabitjen e një banke. Raportohet se ai ishte fshehur herë në Novi Pazar e herë jashtë vendit, deri në momentin e kapjes së tij. Gjorgje Radomiroviq, ishte shpallur në kërkim edhe nga Policia e Kosovës. Në lidhje me rastin është deklaruar për Klankosova.tv edhe zëvendësdrejtori i policisë për veriun, Veton Elshani. "Kemi marrë info nga mediat dhe jemi në pritje të informacioneve zyrtare nga Drejtoria për Bashkëpunim Ndërkombëtar në Fushën e Zbatimit të Ligjit (ILECU)", deklaroi Elshani. /Klankosova.tv https://klankosova.tv/radomiroviqi-iku-nga-alkatrazi-i-veriut-rreth-mesdites-policia-u-njoftua-pas-dy-oresh-12/