Rama: U desh të ndodhë agresioni i Putinit në Ukrainë që BE-ja të avanconte me integrimin e Ballkanit

Kryeministri i Shqipërisë, Edi Rama mori pjesë këtë të enjte në mbledhjen e Komitetit Ekonomik dhe Social Evropian në Bruksel. Në konferencën e përbashkët për shtyp së bashku me Presidentin e këtij komiteti, Oliver Ropke, zëvendëspresidenten e deleguar të Komisionit Evropian të Vlerave dhe Transparencës Vera Jourova, si dhe kryeministrin e Malit të Zi Millojko Spajiq, Rama tha se ajo që po ndodh në Komitetin Ekonomik duhet të ndodh dhe në institucionet e tjera të BE-së. Sipas tij, pjesëmarrja e vendeve të Ballkanit Perëndimor në mbledhjen e këtij komiteti pa të drejtë vote, është një shembull që duhet të ndiqet dhe nga Parlamenti Evropian, Komisioni dhe Këshilli për të mbajtur sa më pranë rajonin. Kreu i qeverisë shqiptare shtoi se u desh Vlladimir Putini dhe agresioni në Ukrainë që BE-ja të avanconte proceset integruese në Ballkan. Ai bëri thirrje që Unioni të mos presë një fatkeqësi tjetër për t’u kujtuar për hapin e radhës. “Unë besoj fort se është tani koha që Bashkimi Evropian të kuptojë se vendet kandidate të Ballkanit Perëndimor janë mjaftueshëm të pjekura dhe janë në një situatë ku duhet të përqafohen dhe të sillen më pranë pa qenë anëtarë me të drejta të plota që është objektivi qendror i këtij procesi. Ajo që po ndodh sot është një shembull ekzemplar që kjo duhet të ndodh dhe me institucionet e tjera të BE-së. Kjo që ndodhë këtu duke të ndodhë dhe në Komisionin Evropian, Parlamentin Evropian dhe Këshillin Evropian”. “Kjo është e vetmja rrugë për të qetësuar të gjithë shpirtrat dhe për të injektuar një energji mjaft konkrete, të prekshme dhe të dobishme në të gjitha vendet kandidate dhe qytetarët e tyre, lidhur me të ardhmen e Ballkanit Perëndimor në Bashkimin Evropian”. “Në të kundërt rrezikojmë t’i hyjmë një rruge që s’mbaron kurrë. Mendoj se plani i ri i rritjes është një shembull i një shkalle ndërgjegjësimi dhe mënyre ndryshe të të parit të Ballkanit Perëndimor dhe vetë të ardhmes të Bashkimit Evropian. Së fundmi po shohim që BE është shumë më e vetëdijshme në vepra dhe jo vetëm me fjalë. Është e trishtë që duhet të ishte Vlladimir Putini që të ndodhte kjo gjë. Duhet ta ruajmë këtë ritëm dhe mos të presim një katastrofë tjetër që BE të kuptoj sa i rëndësishëm është Ballkani Perëndimor për BE-në”, tha kryeministri i Shqipërisë, Edi Rama. /euronewsalbania