Rama sjell në vëmendje bilancin e Italisë: Do ta vrasim njëri-tjetrin apo do të rezistojmë?

Kryeministri shqiptar Edi Rama përsëriti edhe njëherë thirrjen drejtuar qytetarëve që të qëndrojnë në shtëpi për të shmangur përshkallëzimin e situatës, duke sjellë në vëmendje bilancin e viktimave në Itali ku vetëm gjatë ditës së sotme u regjistruan 627 viktima më shumë. Sipas Ramës, ajo që po ndodh në Itali erdhi si pasojë e reagimit me vonesë për vendosjen e masave shtrënguese, shkruan A2 CNN. Shefi i qeverisë shqiptare kërkoi nga qytetarët edhe pak rezistencë që të shpëtojmë njëri-tjetrin.

Postimi i plotë i Edi Ramës në Facebook:

Në Itali sot kishte 627 të vdekur Në Lombardi ku Italia ka një sistem spitalor që është në majën e Europës, nëntë në dhjetë vdekje ndodhin në shtëpi!!! Pse??? Sepse masat shtrënguese u morën vonë, njerëzit u tallën me masat në emër të lirisë për xhiro, për sullaco e për festa dhe armiku u vajti të tërëve nëpër shtëpi! Numri i të sëmurëve e kaloi me galop numrin e shtretërve dhe ja si ka ardhur puna!!! Tani si do i’a bëjmë?! Do vrasim njëri-tjetrin dhe do rrimë duke numëruar me qindra të vdekur e mosozot mijëra? Apo do rezistojmë dhe do shpëtojmë njëri – tjetrin?! Po njerëzit kanë ndenjur 30 vjet në burg apo 30 ditë në grevë urie dhe nuk kanë vdekur, e pse duhet të vdesin sot duke ndenjur në shtëpi pa dalë xhiro apo duke ndenjur në radhë pak më gjatë, pa u ngjitur me njëri-tjetrin?!