Lajmet e fundit
Mbrëmjen e sotme është hapur “Automotive Fair Albania”, edicioni i parë i panairit të makinave në Shqipëri.
I pranishëm në këtë aktivitet ka qenë edhe kryeministri i vendit Edi Rama i cili i ka ftuar të gjithë ta vizitojnë këtë hapësirë pasi sipas tij ka shumë mundësi për të kënaqur fëmijët dhe për të kaluar disa orë ndryshe në Tiranë.
"Ekspozohen gjëra tërheqëse, gjen hapësirë dhe një industri e cila po rritet dhe tek e cila ne besojmë dhe duam të shtyjmë të ardhmen e afërt që të krijojmë vende pune cilësore. Dua t’i ftoj të vijnë ta vizitojnë këtë hapësirë ku ka shumë mundësi për të kënaqur fëmijët e të gjitha moshave dhe natyrisht për të kaluar disa orë ndryshe në një Tiranë që është më e pasur me aktivitete, ky aktivitet ka një profil të veçantë", është shprehur Rama.
Gjatë fjalës së tij, kryeministri Rama ka thënë se do vazhdohet puna për autoparkun e Elbasanit teksa ka shtuar se shpreson që ëndrra për të parë dhe një garë të Formula 1 në një të ardhme, jep besim që të shkohet përpara.
"Ne do të vazhdojmë punën për autoparkun e Elbasanit me një sipërfaqe më të madhe dhe ku shpresojmë se ëndrra për të parë dhe një garë të Formula 1 në një të ardhme të arritshme na jep besim që të shkojmë përpara.".
"Askujt nuk ia kishte marrë mendja se do të kishim në Tiranë një finale evropiane në futboll dhe nuk keni pse të trembemi nga një ëndërr tjetër si kjo e sjelljes së garave automobilistike në Shqipëri dhe të arritjes deri tek një garë e Formula 1 dhe një pistë e cila do të ketë të gjitha parametrat sepse është një projekt i bërë në bashkëpunim të ngushtë me FIA-n e cila mbulon dhe Formulën 1". /tvklan.al
