Lajmet e fundit
Kryeministri shqiptar, Edi Rama, statusin e kandidatit në Bashkimin Evropian e përshkruan “si një lloj pilule kundër depresionit për të rritur moralin e vendeve”.
Rama, në një intervistë për France 24, ku komentoi samitin e BE-së me Ballkanin Perëndimor, tha se e ndjente “të drejtë të njihte ukrainasit si një komb që po bëjnë shumë për ne, se si ata parandalojnë avancimin e kundër-reformës më të frikshme në botë që Putin dëshiron të vendosë”.
Ai tha se nuk është Shqipëria që ka bërë një proces të ngadaltë drejt BE-së, por është kjo e fundit që ka ngadalësuar përparimin për këtë proces.
Rama theksoi se nuk është i frustruar, por tha se është i trishtuar nga dështimi i BE-së për të përmbushur premtimin e dhënë për Shqipërinë dhe Maqedoninë e Veriut.
“Nuk është Shqipëria që ka bërë progres të ngadaltë drejt BE-së, por BE-ja është ngadalësuar. Nuk jam i frustruar, por tepër i trishtuar nga dështimi i Bashkimit Evropian për të përmbushur premtimin e dhënë ndaj Shqipërisë dhe Maqedonisë së Veriut”, mësohet të ketë thënë Rama, shkruan TCh.
I vetmi rezultat pozitiv për Shqipërinë dhe Maqedoninë e Veriut në samitin evropian ishte pranimi në tryezën e këshillit me statusin e vëzhguesit.
Dy vendet janë sërish larg konferencës së parë ndërqeveritare me BE-në.
Kryeministri i Shqipërisë, Edi Rama, dhe ai i Maqedonisë së Veriut, Dimitar Kovaçevski, dhe presidenti i Serbisë, Aleksandar Vuçiq, në konferencën e përbashkët për shtyp e ripërsëritën në forma të ndryshme fjalën ‘zhgënjim’.
Ndërsa sot ndodhi një zhvillim pozitiv, ku parlamenti bullgar miratoi propozimin e presidencës franceze të Këshillit të BE-së për fillimin e negociatave për anëtarësimin e Maqedonisë së Veriut në BE, dhe për rrjedhojë duke i hapur rrugë edhe Shqipërisë.
