Rama pas protestës së PD-së: Të shkuara punonjësve të policisë që u plagosën nga kjo lukuni e verbër

Kryeministri i Shqipërisë, Edi Rama ka reaguar pas protestës së PD-së, duke dënuar aktet e dhunës dhe shkatërrimit të pronës publike. Ai përmes një postimi në “X” gjithashtu ka shprehur solidaritet me punonjësit e policisë që u lënduan gjatë përplasjeve. “Ka në Europë protestues, anarkistë, ekologjistë, ekstremistë të djathtë a të majtë, studentë, anti-globalistë, tifozë huliganë, grupime lloj-lloj që dalin në rrugë për arsyet e tyre, maskohen, armatosen me molotovë dhe thyejnë e djegin, duke plagosur punonjës policie e shkatërruar prona. “Po qysh nga koha e partive famëkëqia të 100 vjetëve më parë në Gjermani e Itali, ka vetëm një parti parlamentare në Europë, që të ketë në programin e aktivitetit të saj si pjesë të pandarë të ekzistencës së vet qysh nga lindja, ushtrimin e dhunës, shkatërrimin e pronës, sulmin ndaj godinave të institucioneve, deri edhe ndaj godinës së vet, mobilizimin e paramilitarëve, të cilët deri dje ishin çeta e liderit shpirtëror, kurse tanimë janë thjesht mercenarë të rekrutuar me lekë nga rrugaçët e lagjeve, që veshin maska apo fshehin fytyrën pas tabelave për  të mbaruar punë me hedhjen e molotovëve pa u identifikuar nga kamerat” “Tanimë këto farë protestash me pisllëkun që krijojnë në bulevard, ngjajnë si jashtëderdhja në rrugë e plakut të lajthitur që i organizon. Degjenerim i pandalshëm dhe dëshpërim i pangushëllueshëm!  Të shkuara punonjësve të policisë që u plagosën e lënduan nga kjo lukuni e verbër”, është shprehur Rama.