Kryetari i Prishtinës, Përparim Rama, i ftuar në emisionin Edicioni Special në Klan Kosova, përgëzoi Presidenten e Kosovës, Vjosa Osmanin, për pjesëmarrjen në marshin "Drejtësi, Jo Politikë", duke theksuar rëndësinë e tejkalimit të ndasive partiake dhe politike kur bëhet fjalë për çështje kombëtare.
"Është shumë pozitive, duhet t’i tejkalojmë ndasitë partiake, politike, kur kemi çështje të mëdha kombëtare. Për këtë arsye po them, se ndoshta tash kur i mbushim 18 vite, nuk jemi adoleshentë, dhe duhet të mendojmë përtej këtyre klikave partiake. I përgëzoj të gjithë politikanët që kanë marrë pjesë dhe u janë bashkuar këtij marshimi,” tha Rama, transmeton Klankosova.tv.
Ai theksoi se në Hagë është duke u gjykuar e ardhmja, historia, paqja dhe liria e vendit tonë.
"Në Hagë është duke u gjykuar e ardhmja, historia, paqja dhe liria e vendit tonë. E gjitha ajo sakrificë... tash kur kemi arritur të krijojmë këtë mrekulli, kur sot e thërrasim Kosovë, cenohet atje në Hagë, nëse nuk triumfon drejtësia”.
Duke folur për festimet e 18-vjetorit të Pavarësisë, ai tha: "Sot kemi pasur festë të madhe, kemi kremtuar 18-vjetorin e Pavarësisë dhe patëm marshin, ku kërkuam të mbrohen vlerat e UÇK-së”.
Ai përfundoi duke thënë: "Të gjitha sheshet kanë qenë të stërmbushura, duhet të jemi të gjithë bashkë kur kemi punë me çështje kombëtare“.
Ndiqeni videon për më shumë:
https://www.youtube.com/watch?v=W2PNMyxbpPk
●●●
VZSHKRIMI NGA
Vanesa Zhugolli
Editorial nga Klan Kosova — ndjek lajme dhe zhvillimet e tjera kryesore të vendit.
