Radio Televizioni italian nis programin e parë në gjuhën arbëreshe në Kalabri

Kalabria është rajoni i parë me statut të zakonshëm në Itali që nis një program të RAI-t kushtuar pakicave gjuhësore, me përmbajtje tërësisht në gjuhën arbëreshe. Kjo nismë pason marrëveshjen mes Presidencës së Këshillit të Ministrave, Departamentit për Informacion dhe Botime dhe RAI-t, që i hapi rrugë prodhimit të programeve televizive dhe radiofonike për promovimin e kulturës arbëreshe. Ajo lidhet drejtpërdrejt me Ligjin 482/1999 dhe Kontratën e Shërbimit Kombëtar, që garantojnë mbrojtjen e pakicave historike gjuhësore, shkruan A2CNN, transmeton Klankosova.tv. "Ne jemi rajoni i parë me statut të zakonshëm që prodhon programim në një gjuhë minoritare dhe kjo më bën veçanërisht krenar si kalabrez. Jam i kënaqur me punën e bërë dhe do të jetë një angazhim i vazhdueshëm për Kalabrinë, por edhe për RAI-n, i cili edhe një herë e kryen rolin e tij si një televizion i shërbimit publik”, deklaroi Massimo Fedele, drejtor i RAI Calabria. Ambasadorja e Shqipërisë në Itali, Anila Bitri Lani, e cilësoi këtë një hap të rëndësishëm për popullin arbëresh, shoqërinë italiane dhe komunitetin shqiptar. “Ai përfaqëson komunikim, mbrojtje dhe vlerësim të një trashëgimie unike gjuhësore, të ruajtur për shekuj në rreth 50 komuna. Forcon ndjenjën e përkatësisë dhe lidh shqiptarët e Italisë me universin arbëresh”, tha ajo. Programi do të nisë më 21 shtator, me një episod çdo të diel në televizion, i fokusuar te komunitetet arbëreshe, ndërsa në radio do të ketë emisione ditore që eksplorojnë aspekte të kulturës arbëreshe, me përsëritje gjatë fundjavës.