Lajmet e fundit
Zgjerimi i rrugëve të Dukagjinit u bë vetëm në letër, në terren këtij projekti nuk po i shihet fundi.
Projekti i cili përfshin zgjerimin e rrugës nga Dollci në Gjakovë dhe nga aty në Pejë, nisi qysh në vitin 2019, raporton Kiks Kosova.
Këto rrugë përfshinin zgjerimin e rrugëve në katër korsi prej daljes nga autostrada “Ibrahim Rugova”.
Në kohën e Qeverisë Haradinaj, nga letrat në terren filloi shpronësimi i tokave.
Mirëpo, tash kur kanë kaluar më shumë se 6 vjet nga nisja e punës në terren, rrugët ende nuk u zgjeruan.
Zvarritjes së punimeve i bëri argat edhe Ministria e Mjedisit, Planifikimit Hapësinor dhe Infrastrukturës.
Kjo ministri, e cila ndau 32 milionë euro për rrugën Kijevë - Dollc, nuk respektoi rregullin bazë të dhënies së tenderëve, kur përzgjodhi kompanitë fituese të këtij projekti.
Sipas nenit 60 të Ligjit për Prokurimin Publik, autoriteti kontraktues, që në këtë rast ishte ministria, duhet t'ia japë kontratën publike operatorit ekonomik që ka dorëzuar tenderin e përgjegjshëm me çmimin më të ulët.
Duke shkelur këtë nen, Ministria e Infrastrukturës llotin 1 të këtij projekti ia dha një kompania e cila ishte e renditur e nënta sipas çmimit.
Bëhet fjalë për kompaninë “R&Rukolli” e cila ishte në konsorcium me “SABA BELCA”, “ELMAZAJ KONSTRUKSION” dhe “Tekno-Konstrukt SH.P.K”.
Vlera e këtij lloti ishte rreth 8 milionë euro, ndërkaq konsorciumi i udhëhequr nga Rrustem Rukolli, ishte rreth 400 mijë euro me e shtrenjtë se kompania më e lirë për nga çmimi.
Një grup tjetër i kompanive të cilat kanë fituar tenderin për lot 2 janë: “Empreus Shpk”, “Jaha Company Shpk” , “Premium Ks”, “Tofior”, “NNT ABC”, “Metag Insaat Ticaret”.
Ndërsa për Lot 3 : “Lika Trade”, “Tofi DOO” , “Lika Company”
Për Lot 4 : “Famis Co Hc” , ‘KIT –AK’ , “Kag Asphalt Company”. Kjo sipas njoftimit të ministrisë për nënshkrim të kontratës.
Menjëherë pas përzgjedhjes së fituesve, dhjetëra kompani u ankuan në Gjykatën e Tenderëve, me pretendimin se Ministria favorizoi operatorët ekonomikë të cilët u shpallën fitues për 4 lotet e vazhdimit të trasesë së magjistrales Pejë–Prishtinë, saktësisht nga Kijeva deri në Dollc.
Për detaje, ndiqni kronikën në vijim:
