Qeveria e Shqipërisë për sulmin kibernetik: Sistemet s’janë prekur

Kryeministria e Shqipërisë ka reaguar sërish sot pas sulmit kibernetik që ka përfshirë sistemet shtetërore të të dhënave. Në deklaratën për mediat thuhet se sulmi është konstatuar mesditën e të premtes dhe menjëherë është bërë izolimi i sistemeve qeveritare.

Sipas Kryeministrisë, sulmi ngjason me atë që u bë sistemeve të Ukrainës në shkurt, por thekson se sistemet nuk janë cenuar.

Lajmi për sulmin kibernetik u bë i ditur një ditë më parë nga Agjencia Kombëtare e Shoqërisë së Informacionit. Për këtë shkak, shërbimet online dhe sistemet qeveritare janë të mbyllura deri në neutralizimin e këtyre akteve kriminale. Sipas Agjencisë Kombëtare të Informacionit, sulmi i sofistikuar drejt sistemit të informacionit, vjen nga jashtë Shqipërisë./euronewsalbania/