Qentë mund t'i nuhasin krizat epilektike që shkakohen te njerëzit

Shkencëtarët francezë kanë thënë se kanë prova se qentë mund të nuhasin erën e një personi i cili mund të kalojë në një krizë epilektike, raporton BBC, transmeton Klan Kosova. Ekipi i Universitetit të Rennes shpreson që në bazë të këtyre gjetjeve të mund të parashikohet se kur njerëzit mund të kalojnë në një krizë epilektike - pra qentë mund të trajnohen në mënyrë që të paralajmërojnë pronarët. Qentë më parë kanë treguar se janë në gjendje të nuhasin sëmundjet duke përfshirë edhe kancerin, Parkinsonin, malarien dhe diabetin. Epilepsia është një prej sëmundjeve më të shpeshta në neurologji. Kjo i takon grupit te sëmundjeve konvulsive, e cila manifestohet me ngërçe të muskujve dhe ndryshim të furishëm të vetëdijes (me një shkallë të caktuar të vetëdijes).