“Punëtorët në Art” i reagojnë ministrisë së Kulturës pas anulimit të "blerjes së veprave të artit” (VIDEO)

Lëvizja Punëtorët në Art (PART) ka thënë se Ministria e Kulturës duke anuluar procedurën për “Blerjen e veprave të artit” ka instrumentalizuar 68 artistë, sipas tyre, për të mbuluar neglizhencën dhe keqmenaxhimin e këtij instuticioni ndaj krizës që ka kapluar skenën e kulturës që nga fillimi i pandemisë në mars të vitit 2020. “Vendimi ad-hoc, i pajustifikuar dhe autoritar i MKRS-së, për anulimin e procedurës “Thirrja publike për blerjen e veprave të artit të artistëve vendor” ka dëmtuar dhe rrezikuar thellësisht kohezionin shoqëror duke shkaktuar antagonizëm në mes artistëve, MKRS-së, dhe publikut, e fuqizuar përmes mbulimit të njëanshëm të çështjes në fjalë nga mediet. Përmes këtij anulimi, në formë indirekte, MKRS e ka delegjitimuar vetveten duke e përmbysë si të parregullt politikën që vet e ka përpiluar. Ndërsa, në formë direkte, ky vendim ka shkaktuar dëmtim të statusit të artistëve, cënim të veprimtarive të tyre artistike si dhe kërcënim të mirëqenies ekonomike në të ardhmen”, thuhet në reagimin e tyre. PART-i i ka parashtruar MKRS-së tri kërkesa – justifikim zyrtar rreth bazës mbi të cilën është marrë vendimi për anulimin e procedures, të kthehet në fuqi procedura e krijimit të Fondit Shtetëror të Qeverisë së Kosovës dhe marrja parasysh e kërkesave dhe krijimi i rregullores adekuate për të mundësuar intervenim në zbutjen e dëmeve në mirëqenien sociale të shkaktuara nga pandemia. Punëtorët në Art përbëhet nga artistë, hulumtues, kuratorë, si dhe punëtorë të pavarur kulturorë në Kosovë. Klan Kosova ka realizuar kronikë lidhur me anuliminin e vendimit për blerjen e veprave të artit të artistëve vendorë. https://www.youtube.com/watch?v=4jQRswyeDfo