Pukë: Gjuajtën me armë drejt policëve, arrestohen të dyshuarit pas 12 orëve në rrethim

Dy persona janë arrestuar në Pukë, pasi kundërshtuan me armë zyrtarët policorë. Siç bën të ditur Policia në Shqipëri, të dyshuarit kërcënuan me jetë efektivët, dhe pastaj u mbyllën në banesë dhe reaguan me armë ndaj punonjësve të Policisë së Repartit Special Renea duke u rrezikuar jetën, dhe pas 12 orësh në rrethim, pamundësisë për t’u larguar dhe pas negociatave me të afërmit e tyre, të njëjtit u vetëdorëzuan, transmeton Klankosova.tv. Në vendin e ngjarjes janë sekuestruar pesë armë zjarri, municion luftarak, granata dore difensive, kapsolla detonatore dhe fitil zjarrpërcjellës. Derisa, në momentin e vetëdorëzimit, njëri prej të dyshuarve kishte një dëmtim tejshpues në kofshën e djathtë, i cili menjëherë është transportuar me ambulancë për në Spitalin Rajonal Shkodër dhe ndodhet jashtë rrezikut për jetën. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, për veprat penale “Nxitja, thirrja publike dhe propaganda për kryerjen e veprave me qëllime terroriste”, “Prodhimi i armëve luftarake”, “Kundërshtimi i punonjësit të policisë së rendit publik”, “Mbajtja pa leje dhe prodhimi i armëve shpërthyese dhe i municionit”.