Promovohet në KK të Klinës libri mbi familjen Tomaj-Quni, ruajtës të kulturës dhe traditës

Në Kuvendin Komunal të Klinës, të mërkurën është bërë promovimi i librit “Familja Tomaj – Quni Dollc”, me autorë Luz Tomaj e Mikel Çuni. Ngjarja është organizuar nën patronatin e Drejtorisë për Kulturë, Rini e Sport të kësaj komune. Siç raporton gazetarja e Klan Kosova, Arife Haliti, në këtë promovim, që konsiderohet jo fort i zakonshëm, u fol për kontributin e familjes Tomaj – Quni (që në esencë janë një familje) që dhanë në ruajtjen e kulturës dhe traditës në kohërat e vështira për shqiptarët. Aty u fol edhe për peripecitë e tyre për ruajtjen e identitetit kombëtar. Komuna e Klinës tha se ky botim sjell një rrëfim të rrallë biografik dhe historik, kushtuar brezave të familjes Tomaj - Quni. “Për më shumë se një shekull, kjo familje i ka ruajtur me dinjitet rrënjët e saj të thella në fshatin Dollc të Klinës, duke lënë pas një trashëgimi të pasur, sakrifica të mëdha dhe një emër që i ka dhënë nder vendit, atdheut dhe kombit”, u tha nga kjo komunë. /Klankosova.tv