Prokuroria për 67-vjeçaren që vdiq dje në Dragash: Ishte viktimë e dhunës nga kunata dhe nipi

Një grua 67-vjeçare nga fshati Kuk i Dragashit ka vdekur mëngjesin e së hënës.

Ajo dyshohet se ka qenë viktmë e dhunës në familje edhe më parë.

Kështu tha për Klankosova.tv zëdhënësja e Prokurorisë Themelore të Prizrenit Fitore Mehmeti - Sejrani.

Mehmeti-Sejrani tha se javën e kaluar ndaj dy anëtarëve të familjes së 67-vjeçares ishte ngritur aktakuzë për "Dhunë në familje".

Aktakuza është ngritur ndaj gruas së vëllait dhe djalit të vëllait të 67-vjeçares.

"Me datë 21 dhjetor 2022, Prokuroria Themelore në Prizren – Departamenti i Përgjithshëm, ka ngritur aktakuzë kundër gruas së vëllait të viktimës dhe djalit të gruas së vëllait, për veprën penale “Dhuna në familje” nga neni 248, të Kodit Penal të Republikës së Kosovës (KPRK), përkatësisht për dhunë psikologjike ndaj viktimës, sepse viktima ka jetuar në shtëpinë e vëllaut të saj”-tha Mehmeti - Sejrani për Klankosova.tv

Rasti i së hënës ishte konfirmuar për Klankosova.tv edhe nga ana e policisë.

Ndër të tjera organet e rendit konstatuan se në trupin e viktimës kishte shenja dhune, dhe vdekja është cilësuar se e dyshimtë.