Prizren: Ndërtuan pa leje një penthouse, aktakuzë ndaj një personi dhe një kompanie

Departamenti i Përgjithshëm në Prokurorinë Themelore në Prizren, ka ngritur aktakuzë kundër të pandehurve I.J., - person përgjegjës i personit juridik, dhe “E.I.”Sh.P.K. – person juridik, për shkak të dyshimit të bazuar mirë se secili veç e veç kanë kryer veprat penale “Punimet ndërtimore të kundërligjshme” dhe “Heqja apo dëmtimi i vulave zyrtare ose i shenjave”. Sipas aktakuzës, nga data 05.04.2024 dhe në vazhdimësi deri më datë 23.04.2024, “në Prizren në rrugën ‘Adnan Krasniqi’, i pandehuri I.J.,- si person përgjegjës i personit juridik dhe ‘E.I.’ Sh.P.K – person juridik, veprojnë në kundërshtim me kushtet e lejes së ndërtimit, në atë mënyrë që në ngastrat kadastrale në Prizren, gjatë zhvillimit të punimeve kanë filluar ndërtimin e aneksit (shtim-ndërtimit) të bazës së penthouset mbi bazën e katit të shtatë (VII) të objektit për banim kolektiv me lokale afariste, duke tejkaluar projektin kryesor të aprovuar me leje ndërtimi, përkundër faktit se Inspektorati i urdhëron që të ndërpriten punimet”. “Të njëjtit vazhdojnë me realizimin e punimeve edhe pas ndërprerjes duke bërë betonimin e aneks pllakës së penthouset, mbi pllakën e aneksit të penthauset betonohen dy shtylla dhe trau”, tha Prokuroria në njoftim. Po ashtu, theksohet se të pandehurit e lartcekur, në mënyrë të kundërligjshme kanë hequr shiritat e ngjitur nga Drejtoria e Inspektorateve të Komunës së Prizrenit, të cilët i kishin vendosur për ndalimin e punëve ndërtimore në penthouse, duke vazhduar me punët ndërtimore në objekt. Me këto veprime, Prokuroria tha se të pandehurit e lartcekur kanë kryer veprat penale “Punimet ndërtimore të kundërligjshme” dhe “Heqja apo dëmtimi i vulave zyrtare ose i shenjave”, sipas KPRK-së. Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartcekur për veprat penale për të cilat akuzohen të shpallen fajtorë dhe të dënohen sipas ligjit. /Klankosova.tv