Prishtina me skulpturë të re dedikuar librit dhe shëndetit mendor

Prishtinës i është shtuar edhe një skulpture që është pjesë e projektit “Ndikimi i leximit aktiv në shëndetin mendor të fëmijëve. Skulptura e vendosur në sheshin “Nënë Tereza” do të qëndrojë aty për një muaj dhe me pas do t’i dhurohet bibliotekës “Hivzi Sylejmani’ ku edhe do të qëndrojë përherë. Më poshtë mund ta lexoni njoftimin e plotë: Puna me raportin hulumtues “Efekti i të lexuarit në mirëqenien psikologjike dhe inteligjencën emocionale të fëmijëve të Kosovës”, sot u kurorëzua me përurimin e një skulpture e cila ngërthen trurin dhe librin, e në të cilën janë gravuar të gjeturat kryesore të këtij raporti. Kjo skulpturë  është vendosur në sheshin “Nënë Tereza”, mes Kino "ABC" dhe Ministrisë së Kulturës, Rinisë dhe Sportit. E njëjta do të qëndrojë për një muaj aty si lokacion ekspozues i veprës artistike, e më pas me organizimin e një ceremonie do t’i dhurohet bibliotekës së qytetit “Hivzi Sulejmani”, në oborrin e së cilës do të qëndrojë përherë. Në skulpturën e punuar nga Butrint Morina, qytetarët do të kenë mundësi të lexojë rezultatet e dala nga hulumtimi gjashtë mujor i organizatave partenere ETEA, Qendra për Hulumtime Psiko-sociale dhe Mjekësore si dhe Qendra për Afirmimin Social të të Rinjve. Disa nga të gjeturat e gravuara në faqet e librit të kësaj skulpture janë, si vijon: “Nxënësit që lexojnë libra jashtëshkollor kanë mirëqenie psikologjike dhe inteligjencë emocionale më të lartë.”; “Të lexuarit aktiv ka ndikim pozitiv në mirëqenien psikologjike dhe inteligjencën emocionale të fëmijëve.”; “Fëmijët që lexojnë më shumë libra në vit dhe ata që janë të regjistruar në bibliotekë kanë mirëqenie psikologjike dhe inteligjencë emocionale më të lartë.” Skulptura është pjesë e  projektit “Ndikimi i leximit aktiv në shëndetin mendor të fëmijëve” dhe është  përkrahur nga Forumi për Iniciativa Qytetare dhe INDEP me burim financiar nga Zyra e Bashkimit Evropian në Kosovë, gjithashtu ky projekt përkrahet edhe nga Komuna e Prishtinës.

klankosova.tv