Presidenti i Kolumbisë i quan "akt tiranie" sulmet e ShBA-së ndaj anijeve të dyshuara të drogës

Sulmet ajrore amerikane ndaj anijeve të dyshuara për trafik droge në Detin e Karaibeve “janë një akt tiranie", tha presidenti i Kolumbisë, Gustavo Petro në një intervistë për BBC, ku bëri thirrje gjithashtu për ndjekje penale kundër zyrtarëve amerikanë nëse hetimet zbulojnë se kolumbianë janë vrarë në sulme. Presidenti Donald Trump i ka cilësuar sulmet, të cilat thuhet se kanë vrarë 17 persona që nga fillimi i tyre këtë muaj, si të nevojshme për të ndaluar rrjedhën e fentanilit dhe narkotikëve të tjerë të paligjshëm në ShBA, transmeton Klankosova.tv. Megjithatë, ekspertët ligjorë dhe ligjvënësit kanë vënë në dyshim nëse ato shkelin ligjet ndërkombëtare të të drejtave të njeriut.