Kuvendi i Kosovës mban seancë të jashtëzakonshme nga ora 17:00, për çështjen e presidentit.
Me kërkesë të deputetëve të Vetëvendosjes, kryeparlamentarja Albulena Haxhiu e ka thirrur seancën, të cilët i është referuar si “diskutim” lidhur me këtë temë.
Bazuar në vendimin e Gjykatës Kushtetuese, ka afat vetëm deri nesër që të zgjidhet presidentit i ri, sepse në të kundërtën vendi shkon në zgjedhje të reja.
LDK e ka propozuar në fundjavë emrin e Vjosa Osmanit, por Vetëvendosje ka kërkuar 'propozime konkrete'.
Klan Kosova do të ju mbajë të informuar me të gjitha zhvillimet!
https://www.youtube.com/watch?v=yk7b8e7nkQ8
Konjufca me akuza, thotë se përmes presidentit po tentohet të rrëzohet qeveria
Ministri i Punëve të Jashtme dhe Diasporës, Glauk Konjufca në fjalën e tij gjatë seancës së thirrur për diskutim rreth zgjedhjes së presidentit, tha se opozita po shfrytëzon këtë çështje, për ta dërguar vendin në zgjedhje.
Ai gjithashtu u shpreh se përmes presidentit po tentohet të rrëzohet qeveria, përcjell Klankosova.tv.
“Kriza të cilën po e kalojmë tash, kjo është bashkimi i subjekteve parlamentare këtu, opozitare, për ta shfrytëzuar çështjen e presidentit që përmes pamundësimit të kuorumit, të çojnë në zgjedhje, e cila është shpresa e tyre, shpresa që përmes shfrytëzimit të një institucioni tjetër në këtë rast, që është presidenti, që nuk ka të bëj më qeverinë, të mund ta rrëzojë qeverinë”, tha Konjufca.
Kurti sulmon dhe fajëson opozitën, tenton t’i ikë përgjegjësisë për presidentin
Kryeministri Albin Kurti sot në seancën e thirrur për diskutim rreth çështjes së presidentit, është shprehur se ka pasur gatishmërinë dhe interesim për të gjetur zgjidhje lidhur me këtë çështje.
Ai foli për kompromisin, duke thënë se duhet të jetë demokratik dhe jo siç tha, pazar për të rehatuar figura politike.
“Marrëveshja politike dhe kompromisi mes partive politike për koalicion qeverisës është gjëja më normale në demokraci. Por, kompromisi në një demokraci, duhet të jetë demokratik. Kompromisi nuk është pazar që lidhet për të rehatuar figura politike”.
“Kompromisi i vërtetë, ai i cili u shërbën qytetarëve ndërtohet mbi dy shtylla të panegocioueshme, së pari mbi respektin për rezultatin e zjedhjeve, pra respektin e vullnetit të qytetarëve dhe peshës politike që ata i kanë dhënë secilit subjekt subjekt politik dhe së dyti mbi përgjegjësinë institucionale dhe demokratike e cila rrjedhë nga angazhimi publik dhe nga fakti se je përfaqësues i zgjedhur i popullit”, tha ai.
Kurti përmendi edhe rezultatin e zgjedhjeve, duke thënë se ai duhet të repsketohet dhe se kjo nuk është nënshtrim.
Fjalë “nënshtrim”, sipas kryeministrit është keqpërdorur nga opizita, duke thënë se kompromision e kupton si nënshtrim të fituesit të zgjedhjeve.
“Rezultati i zgjedhjeve nuk mjafton vetëm të pranohet, rezultati i zgjedhjeve duhet të respektohet dhe respektimi i rezultatit nuk është nënshtrim, një term tjetër i keqpërdorur nga opozita në këtë sallë e jashtë saj. Nëse ka një nënshtrim, ai është ndaj verdiktit të qytetarëve, të cilët me votë kanë përcaktuar peshën e cilit subjekt politik, duke përcaktuar edhe sjelljen parlamentare”.
“Pikërisht për shkak të keqkuptimit të fjalës “nënshtrim”, opozita kompromisin e kupton si nënshtrim të fituesit të zgjedhjeve. Kompromisi është marrëveshje që reflekton realitetin e mandatit zgjedhor duke u dhënë të tjerëve atë që u takon sipas peshës së tyre elektorale”, u shpreh Kurti./Klankosova.tv
Kurti: Dështimi për zgjedhjen e presidentit e dërgon vendin në zgjedhje të reja
Kryeministri Albin Kurti ka marrë fjalën në Kuvendin e Kosovës, ku ka nisur seanca e jashtëzakonshme e thirrur nga partia e tij, për diskutim lidhur me çështjen e presidentit, raporton Klankosova.tv
Kurti e nisi fjalën e tij me afatin kushtetutes që është drejt fundit, duke i përmendur zgjedhjet e reja, raporton Klankosova.tv
“Sot kemi mbërritur në fund të afatit kushtetues për zgjedhjen e presidentit të Republikës. Dështimi e dërgon vendin në zgjedhje të reja, që do të ishin të pestat me radhë prej 16 muajve. Pra pothuajse çdo stinë të vitit do të kishim zgjedhje. Zgjedhjet e reja do të frenojnë punën e Qeverisë.”
Ai tha se Vetëvendosje nuk ka ikur nga përgjegjësia asnjëherë.
“Akuzat se VV ikën nga përgjegjësia nuk janë të vërteta. Nuk ka pasur as në mars të vitit 2021, as në shkurt të këtij viti, asnjë vonesë, asnjë ngurrim dhe asnjë shmangie ën marrjen e përgjegjësive për të qeverisur. Kjo është e matshme dhe e verifikueshme.” /Klankosova.tv
Haxhiu fajëson opozitën: Mungesa e tyre prodhon pasoja direkte
Kryeparlamentarja Albulena Haxhiu ka folur në seancën e thirrur për diskutim rreth zgjedhjes së presidentit, seancë kjo e cila është bojkotuar nga opozita.
Lidhur me këtë, Haxhiu tha se mungesa a tyre prodhon pasoja direkte, derisa u shpreh se gjithashtu e shtyen vendin drejt një krize të panevojshme.
“Mungesa e opozitës është një veprim që prodhon pasoja direkte, bllokimin e një procedure kushtetuese dhe shtyerjen e vendit drejt një krize të panevojshme”.
“Aktgjykimi i Gjykatës Kushtetuese e ka sqaruar këtë çështje në mënyrë përfundimtare “deputetët janë të obliguar që të jenë të pranishëm dhe të votojnë, përveç rasteve kur kanë marrë leje të rregullt paraprake”, tha ajo./Klankosova.tv
Nagavci sërish fton opozitën për pjesëmarrje në seancën për presidentin
Shefja e deputetëve të Lëvzijes Vetëvendosje, Arbërie Nagavci ka treguar arsyet e thirrjes së seancës së Kuvendit të Kosovës, për të diskutuar për çështjen e presidentit.
Ajo ka përsëritur se nga partitë opozitare nuk kanë pranuar asnjë nënshkrim lidhur me emrat për këtë post, derisa ka thënë se Kuvendi duhet të jetë institucioni ku diskutohet të gjitha çështjet me rëndësi.
“Kuvendi është vendi ku duhet të diskutohen çështjet thelbësore për vendin dhe zgjedhja e presidentit nuk është çështje procedurale, por moment ku duhet të diskutohet për konsensus e vullnet politik. Kemi pritur për nënshkrimet e deputetëve të partive tjera, nuk kam pranuar asnjë nënshkrim, e asnjë diskutim lidhur me këtë çështje Atëherë e kemi parë të nevojshme që të diskutojmë në këtë seancë.”, ka thënë ajo në fillim të seancës, e cila është bojkotuar nga partitë opozitare.
PDK-ja, LDK-ja dhe AAK-ja nuk kanë marrë pjesë në këtë seancë, duke e cilësuar ftesën si joserioze, manipulim dhe teatër politik nga partia në pushtet, pasi sipas tyre, ajo është përgjegjëse për krizën politike. /Klankosova.tv
Nis seanca, veç VV në sallë
Ka nisur seanca për diskutim rreth çështjen së zgjedhjes së presidentit të vendit.
Kryeparlamentarja Albulena Haxhiu e ka thirrur seancën, të cilës i është referuar si “diskutim” lidhur me këtë temë.
Opozita e ka bojkotuar këtë seancë, ndaj në sallë është veç Lëvizja Vetëvendosje.
Sipas vendimit të Kushtetueses, ka afat vetëm deri nesër që të zgjidhet presidentit i ri, në të kundërtën vendi shkon në zgjedhje të reja./Klankosova.tv
Nagavci përgjigjet pasi LDK e propozoi Osmanin për presidente
Shefja e Grupit Parlamentar të LVV-së, Arbërie Nagavci është përgjigjur pasi Lidhja Demokratike e Kosovës ka propozuar Vjosa Osmanin për Presidente.
Ajo u shpreh se përveç deklarimit se i kanë nëshkrime, sipas saj, ato duhet edhe të shihen.
Nagavci tha se në këtë drejtim nuk ka asnjë hap serioz, derisa tha se diskutimi duhet të bëhet në Kuvend.
“Përtej deklaratave dhe deklarimit se i kemi 15 nënshkrime, ato nënshkrime duket të shihen. Nuk ka asnjë hap serioz dhe diskutimi duhet të bëhet në Kuvend”, tha ajo.
Seanca u thirr pa marrëveshje, VV do ta provojë me diskutim në Kuvend – Nagavci e konfirmon
Shefja e Grupit Parlamentar të LVV-së Arbërie Nagavci, ka folur para seancës së jashtëzakonshme të thirrur nga kjo parti për Presidentin.
Nagavci para mediave deklaroi se nuk ka pranuar asnjë nënshkrim të kandidatëve nga partitë opozitare.
“Arsyeja se pse kemi kërkuar tre kandidatë është se edhe Lëvizja me partnerët e koalicionit edhe PDK edhe LDK të bëheshin pjesë e zgjedhjes së Presidentit”, tha ajo para mediave.
Në seancë nuk shkon as AAK, Tahiri: Spektakël politik!
Shefi i grupit parlamentar të AAK-së, Besnik Tahiri ka bërë të ditur se as ata nuk do të jenë pjesë e seancës për zgjedhjen e Presidentit.
Ai u shpreh se diskutimet për këtë çështje kanë qenë vetëm një spektakël politik, përcjell Klankosova.tv.
“Diskutimet për zgjedhjen e Presidentit kanë qenë një spektakël politik, me një qëllim të vetëm, me ardhë në këtë situatë. Ne ende nuk kemi asnjë emër, përveç emrave të cilët i ka propozuar VV-ja dhe që janë zyrtar të VV-së dhe nuk janë konsensual”, tha ai.
Tahiri gjithashtu tha se ky duket si një diskutim për të folur vet me vete dhe tha se vendi po shkon drejt zgjedhjeve.
“AAK-ja s’ka qenë e ftuar në këto diskutime, nuk kemi marrë pjesë, rrjedhimisht ne nuk marrim pjesë në një diskutim që prapë është një performancë publike, kësaj radhe siç po shihet do të jetë një performancë publike, një diskutim me fol vet me vete”.
“Kjo seancë është edhe një vazhdim i një spektakli publik, politik që po e çon vendin në zgjedhje. Ne nuk marrim pjesë në këtë, nuk kemi marrë pjesë as atëherë dhe e shohim këtë veprim vetëm një seancë për të folur vet me veti, me kolegë të partisë së vet”, tha ai.
As PDK s’merr pjesë në seancën për presidentin, Hamza: Joserioze!
Kryetari i PDK-së, Bedri Hamza, e ka përsëritur se tema për çështjen e presidentit të vendit është e përmbyllur dhe se për partinë e tij ftesa për seancë të jashtëzakonshme është joserioze.
Sipas tij, një veprim i tillë ka qëllim manipulimin dhe se nuk prodhon rezultat.
Ai ka thënë se i vetmi fajtor pse vendi mund të shkojë në zgjedhje është Albin Kurti dhe Lëvizja Vetëvendosje.
“Para pak çastesh e pranuam edhe një ftesë për seancë të Kuvendit të Kosovës, me një pikë të vetme, zgjidhjen e presidentit të vendit. Është një veprim joserioz. Ka për qëllim manipulimin, një veprim që nuk prodhon rezultat. Një veprim që vendi po shkon në zgjedhje dhe përgjegjës është Kurti.”, ka thënë Hamza.
Ai ka përsëritur gatishmërinë e tij për të ofruar zgjidhje, duke përmendur takimet me Kurtin, por sipas tij, kreu i ekzekutivit nuk ka ofruar asnjë zgjidhje për këtë çështje.
Ndërkohë, sa i përket emrit të Vjosa Osmanit, Hamza ka thënë se LDK-ja dhe VV-ja kanë numra të mjaftueshëm për ta zgjedhur atë, nëse ajo propozohet për presidente. /Klankosova.tv
“Show propagandues”, Abdixhiku i prerë: S’marrim pjesë në seancën për president
Kryetari i LDK-së, Lumir Abdixhiku ka njoftuar se kjo parti nuk do të marrë pjesë në seancën e sotme për presidentin e cila nis në orën 17:00, njofton Klankosova.tv.
Sipas tij, kjo seancë është “show propagandues i VV-së”.
“Nuk marrim pjesë në seancë”, ka thënë kreu i LDK-së para mediave, njofton Klankosova.tv.
Bazuar në afatin e Gjykatës Kushtetuese, deputetët vetëm deri nesër kanë kohë të zgjedhin presidentin e ri, sepse në të kundërtën, vendi shkon në zgjedhje.
“Përplasje” në Kuvend rreth seancës për presidentin, opozita e Haxhiu shkëmbejnë akuza
Në Kuvendin e Kosovës, ku po mbahet seanca që ka nisur në orën 13:00, kanë filluar përplasjet mes pozitës dhe opozitës lidhur me seancën e jashtëzakonshme për zgjedhjen e presidentit të ri të vendit, e cila është caktuar të mbahet sot.
Kryetarja e Kuvendit, Albulena Haxhiu ka kërkuar që deputetët të jenë të pranishëm në seancën që pritet të nisë në ora 17:00, duke përmend nevojën për sigurimin e konsensusit për zgjedhjen e presidentit.
“Është e rëndësishme që të jeni të pranishëm në seancë dhe deri atëherë të shpresojmë që të kemi emra dhe konsensus për president”, tha Haxhiu.
Nga ana tjetër, deputeti i PDK-së, Arian Tahiri, ka deklaruar se mungesa e marrëveshjes politike po e çon vendin në një situatë të re.
“Unë nuk e di ‘zanzibarin’, por e di që Kosova nuk ka pasur kurrë krizë të tillë për zgjedhjen e presidentit. Hera e parë që vendi po shkon në zgjedhje për shkak të mungesës së konsensusit”, ka thënë Tahiri.
Ndërkohë, nga Aleanca për Ardhmërinë e Kosovës, deputetja Time Kadrijaj ka kritikuar thirrjen e seancës së jashtëzakonshme, duke thënë se një situatë e tillë nuk është reale.
“Keni shpikur një ngjarje që nuk ekziston, për të thirrur seancë të jashtëzakonshme për presidentin”, tha Kadrijaj./Klankosova.tv●●●
AHSHKRIMI NGA
Alberta Hyseni
Editorial nga Klan Kosova — ndjek lajme dhe zhvillimet e tjera kryesore të vendit.
