Lajmet e fundit
Dita e madhe e zgjedhjeve presidenciale në ShBA, më 5 nëntor po afron, dhe qytetarët e Wisconsin po shfrytëzojnë mundësitë për të votuar para kësaj date. Një trend i dukshëm është se shumë votues kanë vendosur të shprehin preferencat e tyre politike disa javë para ditës zyrtare të zgjedhjeve.
Një garë e fortë mes republikanit Donald Trump dhe demokrates Kamala Harris po vazhdon të ngjallë pasione të ndryshme mes votuesve, raporton Klan Kosova.
Raymond Lathrop, një mbështetës i Trumpit, thekson se e voton atë për aftësitë menaxheriale, duke thënë: “Ky vend duhet të drejtohet si një biznes. Dhe ai është një biznesmen”.
Nga ana tjetër, Maria Rodriguez, një votuese e Harrisit, thekson rëndësinë e identitetit të saj, duke thënë: “Si një grua me ngjyrë, dua që trupi im të jetë zgjedhja ime”.
Të drejtën e votimit të hershëm e kanë shfrytëzuar edhe lojtarët dhe stafi i ekipit të NBA-së, San Antonio Spurs. Në ditën e parë të sezonit të ri, ata vendosën të votojnë përpara se të kenë më shumë angazhime.
Trajneri i ekipit, Gregg Popovich, inkurajoi të tjerët të ndjekin shembullin e tyre, duke theksuar: “Është një përgjegjësi dhe një e drejtë që të gjithë e kanë”.
Sipas “Edison Research”, rreth 18 milionë amerikanë kanë shfrytëzuar mundësinë e votimit të hershëm deri tani. Në zgjedhjet e vitit 2020, mbi 150 milionë njerëz votuan për kandidatët e tyre para ditës zyrtare, që ishte më 3 nëntor. /Klankosova.tv
