Prej Hagës në Prishtinë: Çfarë pritet nga gjykimi ndaj ish-krerëve të UÇK-së? (VIDEO)

Emisioni “Rubikon”, i drejtuar nga Adriatik Kelmendi, mbrëmë u transmetua drejtpërdrejt nga Haga, pranë Gjykatës Ndërkombëtare të Drejtësisë, në prag të zhvillimeve të rëndësishme në procesin ndaj ish-krerëve të Ushtrisë Çlirimtare të Kosovës. Kelmendi theksoi simbolikën e Hagës, duke përmendur edhe dëshminë e pritshme të ish-presidentit, Hashim Thaçi, i cili pritet të mbrojë karakterin çlirimtar të luftës. “Nga Haga, para Gjykatës Ndërkombëtare të Drejtësisë, një vend që e ka vulosur atë që është shpallur në Kosovë në këtë datë para 18 vjetësh dhe që tani ka nevojë të mbajë edhe një fjalë tjetër nesër – ajo e atij që e lexoi Deklaratën e Pavarësisë, ish-kryeministri i Kosovës atë kohë, i cili e shpalli Pavarësinë. Ai do të duhet të dëshmojë se lufta e tij dhe e shokëve të tij ka qenë luftë e drejtë dhe luftë për të çliruar një popull”, tha ai, transmeton Klankosova.tv. Dje në Prishtinë, protesta “Drejtësi, jo politikë” mblodhi mbi 130 mijë qytetarë. Analisti Flogert Muça e cilësoi atë si reagim mbarëkombëtar, duke paralajmëruar pasoja për rajonin në rast të një vendimi dënues. Ai theksoi se kjo protestë ka rëndësi historike dhe përfaqëson reagim të fortë të shqiptarëve ndaj zhvillimeve të fundit që lidhen me ish-krerët e UÇK-së të cilët po gjykohen në Hagë. “Protesta që ndodhi në Prishtinë nuk është thjesht protesta më e madhe që ka ndodhur në Prishtinë, por është protesta më e madhe që ka ndodhur në kombin shqiptar. Nuk është vetëm një qëndrim i shqiptarëve të Kosovës, por i kombit shqiptar”, u shpreh Muça në “Rubikon”. Ndërkaq, Abelard Tahiri nga Partia Demokratike e Kosovës tha se qytetarët kanë mbështetur financiarisht mbrojtjen e ish-drejtuesve të UÇK-së, duke kritikuar qeverinë për mungesë angazhimi. “Qeveria e Kosovës ka bërë shumë pak, kanë bërë shumë qytetarët e Kosovës. Po mos të ishin ata me i mbështet dy fondacionet e z. Thaçit dhe z. Veselit që të financohej mbrojtja e tyre, të jeni të bindur se ata do të dënoheshin për shkak të mosefikasitetit të mbrojtjes së tyre”, tha Tahiri. Ndërkaq, gazetarja e Klan Kosovës, Rina Mujku ngriti shqetësime për mënyrën e veprimit të Prokurorisë së Specializuar, duke pretenduar se disa dëshmitarë të intervistuar vite më parë nuk janë thirrur në gjykim, çka sipas saj ka mbajtur në pasiguri ekipet mbrojtëse për më shumë se pesë vjet. “Një mënyrë se si Prokuroria i ka mbajtur në ankth ekipet mbrojtëse për kaq shumë vjet është fakti që ka mbi 5 vjet që i ka thirrur për t’i intervistuar, dhe që nga dorëzimi i aktakuzës në nëntor të vitit 2020, tani kaluam 5 vjet e 3 muaj dhe ja ku jemi. Aktakuzën që u ngrit dhe u konfirmua në vitin 2020, e ka ngritur mbi bazën e shumë dëshmive që i ka ftuar më herët dhe i ka intervistuar në Hagë dhe kudo tjetër. Por më pas, ata dëshmitarë nuk janë thirrur më në këtë proces gjyqësor”, tha Mujku e cila gjendet në Hagë për ta përcjellë procesin që nga java e kaluar. Mujku theksoi gjithashtu se ky vendim i Prokurorisë ka pasur një qëllim të qartë: “Ata e dinin se dëshmitarët do të shkatërronin rastin e prokurorisë dhe nuk do të vërtetonin se UÇK-ja ka qenë një ndërmarrje e përbashkët kriminale”. “Prokuroria e Specializuar është mbështetur në ato dëshmi të viteve paraprake, 2020 e më poshtë, sidomos në 2019, dhe nuk i ka sjellë më ata dëshmitarë në sallën e gjykimit, për faktin se ata e dinin që këta dëshmitarë do të shkatërronin rastin e prokurorisë dhe nuk do të vërtetonin se Ushtria Çlirimtare e Kosovës ka qenë një ndërmarrje e përbashkët kriminale”, theksoi gazetarja. https://www.youtube.com/watch?v=XzXVQ51Tjj8&t=3969s