Lajmet e fundit
Polonia vendosi të mos ftojë ambasadorin e Hungarisë në ngjarjen që pritet të mbahet të premten për nisjen e presidencës së Varshavës në Bashkimin Evropian, pasi Budapesti i dha azil një ish-zëvendësministri që është nën hetim për keqpërdorim të dyshuar të fondeve publike, tha një zyrtar i lartë.
Kryeministri hungarez Viktor Orban gjithashtu nuk ishte i ftuar në ceremoninë në Teatrin e Madh të Varshavës, tha zëvendësministrja për Çështjet Evropiane e Polonisë, Magdalena Sobkowiak-Czarnecka.
Varshava reagoi me zemërim kur Hungaria i dha azil politik muajin e kaluar Marcin Romanowskit, ish-zëvendësministër polak i drejtësisë, i cili u arrestua korrikun e kaluar si pjesë e hetimit për keqpërdorimin e fondeve publike.
Romanowski u lirua shpejt, pasi presidenti i një asambleje evropiane për të drejtat e njeriut tha se ai kishte imunitet si anëtar i trupit. Ish-ministri mohon akuzat ndaj tij.
"Kur i ftuam mysafirët në gala-ndejën tonë pothuajse një muaj më parë, ne ftuam të gjithë trupin diplomatik", tha Sobkowiak-Czarnecka në komentet televizive të premten.
"Por pas situatës me ministrin Romanowski, ministri (i Punëve të Jashtme) Sikorski vendosi që ambasadori hungarez nuk është një mysafir i mirëpritur sot".
Kryeministri polak Donald Tusk dhe Antonio Costa, President i Këshillit Evropian, do të mbajnë fjalime në ceremoninë e inaugurimit të presidencës së Polonisë të Bashkimit Evropian, të cilën çdo shtet anëtar e mban për gjashtë muaj me rotacion, shkruan Reuters, transmeton Klankosova.tv.
