Policia kërkon ndihmë për gjetjen e të dyshuarit për vjedhje të rëndë në Letanc të Podujevës

Stacioni Policor i Podujevës ka shpallur në kërkim një person të dyshuar për “vjedhje të rëndë”. Siç njofton Policia, kjo kërkesë është e mbështetur në autorizimin e nxjerrë nga Prokuroria Themelore – Departamenti i Përgjithshëm në Prishtinë. Rasti thuhet të ketë ndodhur nëntorin e vitit të kaluar në fshatin Letanc të Podujevës. “Me qëllim të zbatimit efikas të procedurës, në hetimin që po zhvillohet për rastin ‘Vjedhja e rëndë’ të ndodhur më 06.11.2024, në rrugën ‘Fitorja’ në fshatin Letanc në Podujevë, kërkojmë nga publiku i gjerë kontributin qytetar që me informacionet e tyre të ndihmojnë në drejtim të identifikimit të personit të dyshuar sipas tipareve fizike apo lokalizimin e vendndodhjes së tij”, ka thënë Policia. Ky institucion tha se e vlerëson lart bashkëpunimin me komunitetin për një shoqëri pa krim, “andaj presim që informacionet tuaja t’i kontribuojnë identifikimit dhe arrestimit sa më të shpejtë të të dyshuarit”.