Policia jep detaje shtesë për sulmin e katër nxënësve nga qeni në shkollën e Shirokës

Policia ka dhënë detaje shtesë për rastin e sulmit të qenit ndaj katër nxënësve në shkollën "17 Shkurti", në Shirokë të Suharekës. Në raportin 24-orësh të policisë thuhet se qeni dyshohet se ishte i tërbuar dhe fillimisht i ka sulmuar dy fëmijë duke ju shkaktuar lëndime trupore. Më pas, lëndime trupore gjatë ikjes kanë pësuar edhe dy nxënës të tjerë, me ç’rast të lënduarit janë dërguar për trajtim mjekësor. "Lidhur me rastin patrulla policore ka intervenuar dhe i është përgjigjur rastit me ç’rast zyrtarët policor janë ballafaquar me rrezikun nga qeni i cili u është vërsulur edhe zyrtarëve policor. Me qëllim të eliminimit të rrezikut një zyrtar policor ka përdor pajisjen zyrtare (armën zyrtare) në drejtim të qenit duke e asgjësuar qenin", thuhet në raport. Pas inicimit të rastit është arrestuar i dyshuari kosovar (pronari i qenit) nën dyshimin se e ka lënë qenin pa përkujdesje. Me vendim të prokurorit i dyshuari është dërguar në mbajtje. /Klankosova.tv