Policia has në prerës ilegalë të druve në Malet e Sharrit - ata ikin dhe i vënë zjarrin automjetit

Policia sot gjatë patrullimit në Malet e Sharrit, në rrugën për në Luboten, ka hasur një automjet tip xhip me rimorkio të ngarkuar me dru të prerë ilegalisht. Në njoftimin e lëshuar për media thuhet se pavarësisht sinjaleve të policisë për ndalim, personat e dyshuar kanë vazhduar lëvizjen. Më pas, në një rrugë malore, policia thotë se të dyshuarit kanë shkarkuar disa dru për të penguar policinë, i kanë vënë zjarrin automjetit dhe janë larguar në drejtim të panjohur. “Në vendin e ngjarjes kanë dalë, komandanti i stacionit policor, një njësi e NJRSH dhe janë njoftuar edhe zyrtarët e Parkut Kombëtar ‘Sharri’”, thuhet në njoftim. Policia shton se janë ndërmarrë veprime hetimore dhe është në proces identifikimi i të dyshuarve. /Klankosova.tv