Policia gjen municion në një shtëpi të pabanuar në Zubin Potok

Një sasi municioni dhe pajisje të ndryshme janë gjetur dhe konfiskuar nga Policia e Kosovës gjatë një patrullimi në fshatin Padinë të Zubin Potokut. Sipas raportit, rasti ka ndodhur më 6 prill 2026, rreth orës 14:50, kur zyrtarët policorë kanë kontrolluar një shtëpi të pabanuar në këtë zonë. Gjatë kontrollit, ata kanë hasur në 15 fishekë të mbushur për pushkë gjuetie dhe 11 fishekë të zbrazur. Po ashtu, në vendngjarje janë gjetur dhe sekuestruar një makinë për mbushjen e fishekëve, një sasi baruti, diabola si dhe një pjesë e një uniforme ushtarake. Autoritetet bëjnë të ditur se deri më tani nuk ka persona të dyshuar të lidhur me rastin, ndërsa hetimet janë duke vazhduar për të zbardhur rrethanat dhe origjinën e këtyre mjeteve. Rasti po cilësohet si "Armëmbajtje pa leje".