Një plan mizor për përgatitjen e vrasjes së bashkëshortes. Gjetja e ekzekutuesit dhe skenarët për kryerjen e krimit. Blerja e armës dhe takimet për realizimin e një vrasje makabre, para syve të fëmijëve.
“Grabitja” që doli të ishte e inskenuar nga kryerësit e këtij krimi.
Hetues policorë që dekonspiruan planet e fshehta. Që prangosën autorët dhe që çuan në prova konkrete para organeve të drejtësisë.
Gjykata që dha verdiktin më të lartë, atë të burgimit të përjetshëm për Naim Murselin e Granit Plavën, si organizatorë dhe ekzekutorë të vrasjes së Liridona Ademajt.
Dënim që riktheu besimin se drejtësia mëgjithatë e thotë fjalën e saj.
Familjarë që ndihen sadopak të lehtësuar pas një aktgjykimi të tillë.
Shoqëri që duartroket për drejtësinë që e kërkonte.
Rasti i vrasjes së Liridona Ademajt është një prej krimeve më të mëdha që ka tronditur Kosovën viteve të fundit.
Në vazhdim, është pikërisht historiku i këtij plani mizor e deri te drejtësia për vrasjen e Liridona Ademajt.
Nata e krimit (29 nëntor 2023):
Rreth orës 20:20, në rrugën "Dalip Alshiqi" në Prishtinë, u raportuan të shtëna me armë zjarri. Policia dhe ekipet mjekësore gjetën Liridona Ademajn pa shenja jete brenda veturës.
Fillimisht, rasti u raportua nga Policia e Kosovës si "grabitje me pasoja të vrasjes", bazuar në versionin fillestar të ngjarjeve.
“Grabitje me pasjoja të vrasjes - Me datën 29.11.2023, rreth orës 20:20, kemi pranuar informatën për të shtëna me armë në rrugën "Dalip Alshiqi" në Prishtinë. Policia si dhe mjekët emergjent, menjëherë kanë dalë në vendin e ngjarjes, ku në një veturë kanë hasë një person pa shenja jete. Vdekjen e viktimës (femër) e ka konstatuar ekipi mjekësor në vendin e ngjarjes. Mbështetur në informacionet e para, dyshohet se bëhet fjalë për vrasje me armë zjarri. Policia në koordinim me prokurorinë, ka nisur hetim dhe ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rastit. Pas përfundimit të ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar lidhur me rastin e sipërshënuar. Njësiti i hetimeve të përgjithshme të Prishtinës në koordinim me Prokurorinë është duke e vazhduar operacionin e bastisjes në dy lokacione në Gjakovë”, ishte ky njoftimi i parë i policisë më 1 dhjetor 2023.
https://klankosova.tv/vrasja-e-gruas-ne-prishtine-dyshohet-se-u-be-per-motive-plackitjeje/
Arrestimet e para (1 dhjetor 2023):
Por, pas hetimeve intensive, policia zbuloi se grabitja ishte e inskenuar. U arrestuan:
Naim Murseli, si i dyshuar kryesor për porositjen e vrasjes së bashkëshortes së tij;
Granit Plava, i cili dyshohet se kreu vrasjen me pagesë;
Më vonë u arrestua edhe Kushtrim Kokalla për bashkëpunim.
Më 3 dhjetor, Naim Murselit, Granit Plavës dhe Kreshnik Kokallës iu caktua nga 1 muaj paraburgim si të dyshuar për vrasjen e Liridona Ademajt.
https://klankosova.tv/naim-murselit-dhe-dy-te-tjereve-te-dyshuar-per-vrasjen-e-liridones-iu-vazhdohet-paraburgimi/
https://klankosova.tv/krejt-cfare-dihet-rreth-plackitjes-ne-prishtine-ku-mbeti-e-vrare-nje-grua/
Rivarrimi (4 dhjetor 2023):
Liridona Ademaj ishte varrosur fillimisht në fshatin e bashkëshortit, në Cërmjan të Gjakovës. Megjithatë, pas zbulimit të përfshirjes së Naim Murselit në krim, familja e viktimës kërkoi zhvarrosjen e saj. Me miratimin e Prokurorisë, ajo u rivarros me dinjitet në vendlindjen e saj, në fshatin Rracaj të Gjakovës.
https://klankosova.tv/sot-rivarroset-liridona-ademaj/
Vrasja e Liridona Ademajt nuk u kalua në heshtje. Më 5 dhjetor 2023, Prishtina u pushtua nga protestat masive të organizuara nga Kolektivi për Mendim dhe Veprim Feminist, nën thirrjen për siguri dhe drejtësi për gratë.
https://klankosova.tv/protestuesit-thyejne-kordonin-e-policise-therrasin-emrin-e-liridones-video/
https://klankosova.tv/mbahet-marshi-kunder-vrasjes-se-grave-me-moton-stop-femicidit/
Dëshmitë e Naim Murselit dhe Granit Plavës para hetuesve policorë
Në janar të vitit 2024, Naim Murseli para hetuesve policorë kishte deklaruar se ka qenë në dijeni se Granit Plava ishte personi që shtiu me armë zjarri për të vrarë bashkëshorten e tij, Liridona Ademajn, mbrëmjen e 29 nëntorit të vitit 2023.
Por, Murseli nuk e ka pohuar të ketë porositur vrasjen e saj, ndonëse e ka pranuar se është takuar me të dyshuarin për vrasje, Granit Plavën, në ditën kritike.
Sipas aktakuzës, Naim Murseli në deklaratën e dhënë në Polici më 29 nëntor 2023 në cilësinë e dëshmitarit, ka dhënë versionin e tij se si ka ndodhur ngjarja. Ka thënë se ishin grabitur dhe se ai me fëmijët kanë arritur të dalin nga vetura, kurse tani e ndjera Liridona kishte mbetur në veturë.
Murseli në cilësinë e të dyshuarit: S’kam dhënë ndonjë ide dhe nuk kam ndërmarrë asnjë veprim për ta realizuar këtë vrasje
Kurse, në deklaratën e dhënë në cilësinë e të dyshuarit më 1 dhjetor 2023, në prani të mbrojtësit të tij ka theksuar se pas 10 viteve martesë, kishin filluar problemet martesore, duke thënë se Liridona ka qenë xheloze, temperamente dhe kontrolluese, e që ka pasur presion psikik nga ajo, sikurse janë telefonatat e shpeshta e kërkimi i dëshmive me foto se ku gjendet e me kë.
Naimi thuhet se deklaroi që nuk ishte më i lumtur, por që Liridona, sipas tij, nuk e pranonte ndarjen. Tha se një problem që kishte ndodhur mes tyre në mars 2023, vështirësoi akoma lidhjen e tyre. Pas kësaj, tha se iu shtua presioni e që sipas tij ndikoi të mendonte edhe vetëvrasjen.
Sipas tij, në një bisedë me djalin e dajës së tij (Kushtrim Kokallën) ai i ka thënë se ia zgjidh këtë punë, e që fillimisht kishin menduar për inskenimin e një aksidenti, por që shoku i Kushtrimit (Granit Plava) kishte insistuar që veprën ta kryente me armë, sipas mënyrës së tij.
“…unë nuk kam dhënë ndonjë ide dhe nuk kam ndërmarrë asnjë veprim për ta realizuar këtë vrasje”, citohet të ketë deklaruar Murseli.
Në ditën kritike, thotë se ishte takuar me Granitin në Gjakovë, rrugës iu ishte dëmtuar goma, e kur ishin ndaluar për ta rregulluar, personi që iu ndihmoi e ka pyetur Plavën, se a është i interesuar për të blerë armë, e për të cilën ia kishte dhënë Naimi paratë prej 250 euro Granitit për ta blerë atë. Më pas, tha se ishte nisur në drejtim të Prishtinës bashkë me Granitin, e pasi i kishte thënë ta dërgonte në Kralan, kishin vazhduar rrugën ndaras për Prishtinë, ku sipas tij, Plava e kishte ndjekur prapa me veturë tjetër deri afër shtëpisë, e më pas i kishte thënë “unë tash e di çka bëj”.
Më pas, Naimi ka deklaruar se kishin vazhduar në darkë me Liridonën dhe dy fëmijët, thotë se nuk e ka vërejtur se Plava kishte qenë në atë restorant, por që ai i kishte shkruar dhe dërguar një foto. Graniti kishte thënë se doli nga lokali, e kur përfunduan darkën Naimi thotë se vazhduan për në shtëpi, e në afërsi të shtëpisë, Graniti u doli me armë e i maskuar.
“… edhe pse isha në dijeni për prezencën e tij unë asnjëherë nuk kam besuar në të vërtet se Graniti do të merr veprime për vrasje, i shokuar kam ndaluar unë i kam ngritur duart lartë dhe i kam thënë bashkëshortes jepja krejt çka të kërkon, dhe në një moment unë kam hapur derën time, pastaj derën e fëmijëve duke i thënë bashkëshortes të largohet nga vetura dhe në momentin që jemi larguar disa metra kam dëgjuar një krismë, por pa e parë çfarë ndodhi”, citohet të ketë deklaruar Murseli.
Më tej, thuhet se deklaroi që kishte kërkuar ndihmë tek shtëpitë afër. Tha se pronari i marketit e kishte njoftuar Policinë e se ai i kishte kërkuar të qëndronte aty me fëmijët derisa të arrijnë zyrtarët policorë.
Ndryshe, në deklaratën e dhënë në Prokurori më 30 korrik 2024, Naim Murseli ka deklaruar se nuk ka ndonjë informacion të ri për rastin. Për policat e sigurimit jetësor në Suedi, ai kishte thënë se kishte lidhur kontratë me një kompani ai për vete dhe Liridona për vete. Për tani të ndjerën tha se nuk e dinte se në çfarë shume e ka pasur kontratën e lidhur dhe nuk e di se kush është përfituesi i asaj police.
Gjithnjë sipas deklaratës së Murselit, ai ka thënë se më 2022 kur kishte lidhur Liridona atë kontratë, raportet i kishin të mira. Një rast kur deshi të bënte shkurorëzim e kishte pranuar, sipas tij, me qëllim që Liridona t’ia bënte letrat motrës, por që kur kishin paraqitur dokumentet, motra e saj ishte shkurorëzuar.
Pas autorizimit të Prokurorisë për një intervistë nga ana e Policisë në hapësirat e Shërbimit Korrektues më 18 tetor 2024, thuhet se pranoi edhe për një tentim shkurorëzimi në Suedi para rastit që e ka dëshmuar, me arsyetimin për t’iu mundësuar blerja e një shtëpie.
“Naimi e çeli xhamin, unë qëllova”, dëshmia tronditëse e Granit Plavës për vrasjen e Liridona Ademajt
Dy vjet pas vrasjes së Liridona Ademajt, dëshmitë e reja nga Forenzika Psikiatrike kanë zbardhur skenarin makabër të organizuar nga Naim Murseli për eliminimin e bashkëshortes së tij.
Sipas dëshmisë së ekzekutorit Granit Plava, krimi ishte i planifikuar në detaje; Murseli i kishte dorëzuar armën dhe municionin që në mëngjesin e ditës kritike dhe e kishte udhëzuar atë përmes mesazheve gjatë gjithë kohës, duke i dërguar lokacionin e saktë të lëvizjeve të familjes.
https://klankosova.tv/naimi-e-celi-xhamin-une-qellova-deshmia-tronditese-e-granit-plaves-per-vrasjen-e-liridona-ademajt/
https://klankosova.tv/vellai-i-liridona-ademajt-vrasja-ishte-e-planifikuar-dhe-u-realizua-per-shtate-minuta/
Seanca e rëndë për familjen, plani kriminal dhe darka e fundit para vrasjes së Liridona Ademajt
Në Gjykatën Themelore në Prishtinë, më 22 dhjetor 2025 në seancën gjyqësore ndaj Naim Murselit, Granit Plavës dhe Kushtrim Kokallës për vrasjen e Liridona Ademajt, u shfaqën video-incizime që tregojnë takimet dhe lëvizjet e të akuzuarve para ngjarjes, përfshirë darkën e Liridonës me familjen dhe vëzhgimin nga Granit Plava.
Sipas aktakuzës, vrasja ishte e planifikuar, me marrëveshje që Plava ta kryente për 30 mijë euro, ndërsa arma dyshohet se u sigurua nga Naim Murseli përmes Kushtrim Kokallës, raporton Klankosova.tv.
Prokuroria kishte paraqitur prova materiale dhe pamje nga momentet para dhe gjatë aktit, po ashtu edhe momentin kritik, ku dëgjohet krisma dhe britmat e fëmijëve.
https://klankosova.tv/detaje-1tronditese-si-u-zbulua-plani-i-vrasjes-se-liridona-ademajt-flet-gazetarja-tershani-video/
Plava tregon versionin e tij për planin mizor të Murselit për vrasjen e Liridonës
Në seancën e 26 marsit 2026, Murseli mbrojti versionin e tij se ngjarja ishte një grabitje që kishte për synim vetëm paratë dhe telefonat, pavarësisht përballjes me prova nga kryetarja e trupit gjykues, Fatime Dermaku, të cilat hedhin dyshime mbi këtë pretendim.
Dermaku ballafaqoi me prova të akuzuarin duke faktuar se Liridona në natën kritike kishte pasur stoli të arit (dy bylyzykë dhe një unazë). Murseli paraprakisht tha se Liridona nuk ka pasur me vete gjëra me vlerë.
Pas kësaj ai deklaroi para trupit gjykues se në momentin e grabitjes, grabitësi kishte kërkuar vetëm para dhe telefona.
“Këtë pyetje më ka bërë edhe prokurorja kur kam qenë në prokurori dhe po ju përgjigjem edhe juve: Në momentin e grabitjes të vetmen gjë që e ka kërkuar kanë qenë telefonat dhe paratë, nuk ka kërkuar gjë tjetër”, tha Murseli.
I akuzuari u përball edhe me dëshminë e tij paraprake ku kishte thënë që fëmijët ishin larguar nga vetura nga e njëjta derë, teksa gjyqtarja nga paraqitja e provave e pyeti se si do kishte mundësi të ndodhte një gjë e tillë dhe të mos lëvizte lodra e fëmijëve.
“Nuk e di gjyqtare. Po të tregoj qysh ka ndodhë”, tha Murseli.
E arma me të cilën u vra Liridona Ademaj ishte blerë nga vetë Murseli, teksa ky i fundit para trupit gjykues tha se atë e kishte blerë për shkak se i akuzuari tjetër në këtë rast, Granit Plava i kishte thënë se mund ta shiste më shtrenjtë.
Ai shtoi se nuk do të kishte përfitim nga kjo shitje, por qëllimi i tij ishte ta ndihmonte Plavën të cilin e kishte bashkëfshatar.
Para trupi gjykues, Naim Murseli tha se më vonë e kishte zbuluar që ajo armë ishte përdorur për ta vrarë Liridona Ademajn.
Ai gjithashtu deklaroi se Liridona i kishte kërkuar të ndalej në momentin kritik, për çka tha se e dëgjoi bashkëshorten.
“Ajo ka thënë ndalu, ndalu, unë u ndala. Vendim i gabuar, po çka me bë”, u shpreh i akuzuari.
Më pas, kryetarja e trupit gjykues, Fatime Dermaku e pyeti të akuzuarin se a e kishte kthyer kokën prapa kur po ikte me fëmijët, për të parë nëse Liridona po i ndiqte nga pas, pyetje së cilës ai iu përgjigj me “jo”.
“Jo nuk e kam kthyer. Kur e kemi dëgjuar krismën kemi ikur, kam menduar që në drejtim tonë ka gju”, kishte deklaruar Naim Murseli.
Në po këtë seancë, i akuzuari kryesor Naim Murseli kishte pasur një kërkesë ndaj gjykatës.
Ai kishte kërkuar nga trupi gjykues që kur përmendet emri i së ndjerës, të thirret në mbiemrin e tij pra Murseli e jo Ademaj.
https://klankosova.tv/nuk-e-ktheva-koken-kur-i-degjova-krismat-cka-deklaroi-naim-murseli-pas-aktit-te-vrasjes-se-liridones111/
Ndërkaq, i akuzuari tjetër në këtë rast, Granit Plava, ka ndryshuar deklaratën e tij gjatë seancës gjyqësore, duke thënë se vrasja është kryer në bashkëpunim me Naim Murselin.
Në dëshminë e tij, ai u tërhoq nga ajo që kishte thënë më parë, duke pretenduar se deklarata e mëhershme ishte bërë si pjesë e një marrëveshjeje me Murselin dhe se tani po rrëfen të vërtetën.
Sipas Plavës, ai kishte pranuar të marrë fajin për krimin, ndërsa thekson se Murseli i kishte premtuar se nuk do të vuante më shumë se dy vjet burg, si dhe do të përfitonte një vend pune, pagë mujore dhe veturë luksoze.
Në seancën e kaluar, ishte Prokuroria ajo që kishte ngritur dyshimet se krimi i rëndë ndodhi për arsye të përfitimit financiar. Ky institucion i ka rrumbullakuar të gjitha borxhet e Naim Murselit që i ka deri më tash, ku rezulton se i njëjti i ka rreth 500 mijë euro borxh.
Ndërsa, në seancën e 29 janarit, Naim Murseli pati thënë para trupit gjykues se nuk ka pasur asnjë marrëveshje për ta vrarë Liridonën.
https://klankosova.tv/plava-ia-qet-ne-lendine-murselit-planin-mizor-per-vrasjen-e-liridones-perballja-me-provat-sot-ne-gjyq111/
“Burgim i përjetshëm”, si erdhi deri te kërkesa e prokurores (VIDEO)
Seanca e fjalëve përfundimtare në rastin e vrasjes së Liridona Ademajt ka përmbyllur një nga proceset më të ndjekura, ndërsa vendimi për tre të akuzuarit, Naim Murseli, Kushtrim Kokalla dhe Granit Plava, ishte planifikuar të shpallet më 21 prill.
Në përmbyllje të paraqitjes së fjalës përfundimtare, prokurorja Javorka Perlinçeviq kërkoi dënim me burgim të përjetshëm për të tre të akuzuarit, duke e cilësuar rastin si “krim makabër”, raporton Klankosova.tv.
Ajo deklaroi se gjatë shqyrtimit janë paraqitur tri versione të ndryshme të ngjarjes, të cilat, sipas saj, përfaqësojnë përpjekje për shmangie të përgjegjësisë dhe bartje të fajit tek të tjerët, duke i përshkruar si “tre skenarë të ndryshëm të një ngjarjeje”.
Në këtë kontekst, prokurorja solli edhe deklarimet që lidhen me fëmijët e viktimës, duke cituar se djali i madh ka deklaruar se, “Hajni e futi dorën dhe i bëri mamit bam”.
Njëherësh gjatë fjalës përfundimtare në seancë, Perlinçeviq tha se fëmijët refuzojnë kontaktet telefonike me Naim Murselin, të mundësuara nga Qendra për Punë Sociale në Suedi.
Përballë këtyre akuzave, ish-bashkëshorti dhe njëri ndër të akuzuarit, Naim Murseli mohoi çdo përfshirje në krim, duke deklaruar se është akuzuar padrejtësisht për një vepër që, sipas tij, nuk e ka kryer.
Në vijim, fjalën e mori edhe mbrojtja e Granit Plavës, i cili hodhi poshtë akuzat ndaj tij, duke përmendur mungesën e provave.
Avokati Skender Gojani deklaroi se Prokuroria nuk ka arritur të dëshmojë përfshirjen e klientit të tij, pasi, sipas tij, nuk ekziston asnjë provë direkte, forenzike apo teknike, dhe as dëshmitarë që e lidhin atë me të shtënat në natën kritike.
Në fjalët përfundimtare të procesit gjyqësor, u dëgjua edhe deklarimi i familjes së Ademajt.
Vëllai i saj, Leonardi, tha se gati tre vite pas ngjarjes, dhimbja mbetet e madhe, por familja ka zgjedhur të besojë në drejtësi.
“Janë bërë gati tre vite që nga vrasja e Liridonës. Më kujtohet si sot momenti i arrestimit të të akuzuarve, ose thënë ndryshe kriminelëve, të cilët natën vrajnë e ditën qajnë. Për ne si familje nuk ishte e lehtë kjo periudhë. Kemi zgjedhur besimin në vend të zhgënjimit”, tha mes tjerash Leonardi.
Se a do të jetojnë në frikë këtë jetë, Leonardi tha se kjo është në dorë të trupit gjykues.
“Na ka mbetur edhe një gjysmë jete, të cilën e keni në duar ju ta vendosni se a duhet të jetojmë me frikë apo duhet të ndihemi të sigurt në vendin tonë. Andaj kërkojmë që dënimi të jetë me burgim të përjetshëm. Çdo dënim tjetër e denigron Liridonën, vendin, shoqërinë dhe vetëdijen e populli tonë për këtë krim makabër. Vetëm vuajtja e dënimit të tyre, e qetëson sado pak dhimbjen e familjes tonë”, deklaroi Leonard Ademaj. /Klankosova.tv
●●●
VZ
SHKRIMI NGA
Vanesa Zhugolli
Editorial nga Klan Kosova — ndjek lajme dhe zhvillimet e tjera kryesore të vendit.
