Lajmet e fundit
Plani i presidentit ukrainas, Volodymyr Zelensky për t'i dhënë fund luftës gati trevjeçare të Ukrainës me Rusinë ka marrë reagime të ndryshme nga aleatët perëndimorë deri më tani.
"Plani i fitores" që Zelensky përshkroi brenda dhe jashtë vendit përfshin një ftesë zyrtare për Ukrainën për t'u anëtarësuar në NATO dhe leje për të përdorur raketa perëndimore me rreze të gjatë veprimi për të goditur objektivat ushtarake në Rusi - dy hapa që aleatët e Kievit kanë hezituar t'i mbështesin më parë, shkruan AP, transmeton Klankosova.tv.
Mbështetja e ShBA-së është thelbësore nëse Zelensky do të marrë mbështetje nga aleatët e tjerë për propozimet që ai beson se janë të nevojshme për të forcuar pozicionin e Ukrainës në fushën e betejës dhe përpara çdo negociate për paqe. Por analistët thonë se administrata Biden nuk ka gjasa të marrë një vendim përpara zgjedhjeve presidenciale në ShBA më 5 nëntor, pasi mund të mos apelojë tek votuesit.
Analistët thanë se plani është një hap në drejtimin e duhur për përpjekjet ushtarake të Ukrainës. Ata gjithashtu e përshkruan atë si ambicioze, duke pasur parasysh frikën e aleatëve për përshkallëzimin me Rusinë e armatosur bërthamore. Ukraina ka siguruar më parë mbështetjen perëndimore për kërkesat që dikur konsideroheshin joreale, si sistemet e mbrojtjes ajrore Patriot dhe avionët F-16.
