Lajmet e fundit
Drejtori i Zyrës për Kosovën në qeverinë serbe, njëherësh kryenegociator në bisedimet mes Kosovës dhe Serbisë në Bruksel, Petar Petkoviq, tha sot pas raundit të ri të dialogut në Bruksel se nuk ka marrëveshje për shkak të “mungesës së vullnetit për të arritur një zgjidhje të balancuar dhe kompromisi”, por se pritet një takim tjetër.
I dërguari i posaçëm i BE-së për atë dialog, Miroslav Lajçak, do të ftojë një tjetër takim pas dhjetë ditësh “për dinarin, pagesat dhe të gjitha juridiksionet e Serbisë për popullin serb në Kosovë”, tha Petkoviqi, raporton agjencia shtetërore serbe e lajmeve “Beta”, transmeton Klankosova.tv.
Ai tha se në takim ka ripërsëritur planin dhe propozimin për një “zgjidhje kompromisi dhe të balancuar” dhe se ka avokuar për formimin e Asociacionit të Komunave me Shumicë Serbe në Kosovë.
“Ky është obligim i tyre dhe nëse do ta kishin përmbushur, shumë nga problemet e sotme nuk do të ekzistonin. Nuk kishte vullnet të mjaftueshëm nga ana e Prishtinës”, tha ai.
Në takimin në Bruksel me ndërmjetësimin e Lajçakut, kryenegociator i Kosovës ishte Besnik Bislimi. /Klankosova.tv
