Lajmet e fundit
Miltoni, një uragan i kategorisë pesë, po i afrohet bregdetit të Floridës, duke shkaktuar panik mes banorëve. Mijëra amerikanë, për të shpëtuar nga kjo stuhi e fuqishme, janë mbledhur në autostrada, duke formuar kolona të gjata makinash që ecin ngadalë drejt zonave të sigurta.
Policia ka ndërmarrë një fushatë evakuimi, duke trokitur derë më derë për të siguruar që asnjë person të mos mbetet në rrezik.
Megjithatë, disa familje kanë refuzuar të braktisin pronat e tyre, duke u shprehur të sigurt në aftësitë e tyre për të përballuar situatën. Një nga ata, Tommy Hall, tha: “Ne kemi zgjedhur të qëndrojmë. Kemi benzinë, ushqim, dy gjeneratorë dhe kondicionerë portativë për të ftohur dhomat. Mendoj se do ia dalim”.
Në mes të kësaj situate të tensionuar, guvernatori i Floridës, Ron DeSantis, shprehu shqetësimin e tij për situatën dhe bëri thirrje për një evakuim të shpejtë. Ai deklaroi: “Shumë vëmendje po i kushtohet valës së stuhisë në bregun perëndimor të gadishullit të Floridës. Ky është ndoshta kërcënimi më serioz për jetën dhe pronën e njerëzve”.
Michael Brennan, drejtor i Qendrës Kombëtare të Uraganeve, përshkroi pasojat që priten nga Milton, duke thënë se “kemi përmendur 3 deri në 4.5 metra përmbytje, që është shumë mbi lartësinë e një personi”. Ai paralajmëroi se kjo stuhi do të sillte sasi të fuqishme uji, i cili do të shkaktojë dëme të mëdha.
Situata alarmante detyroi edhe presidentin amerikan të anulojë udhëtimet e tij në Gjermani e Angola për të qenë i pranishëm në përgjigjen e duhur nga shkatërrimi i mundshëm i kësaj stuhie.
Astronautët e NASA-s gjithashtu dokumentuan fuqinë e uraganit me video, duke paralajmëruar se goditja e tij pritet të ndodhë në orët e vona të së mërkurës ose mëngjesin e së enjtes. /Klankosova.tv
