Pesë ditë pas zgjedhjeve parlamentare, liderët e Evropës mblidhen në Tiranë

Takimi i Komunitetit Politik Evropian do të zhvillohet në Tiranë më 16 maj të vitit 2025. A2 CNN mëson se ky takim, një nismë e presidenti të Francës, Emmanuel Macron, do të mbahet pesë ditë pas zgjedhjeve parlamentare në Shqipëri. Takimi i Komitetit Politik Evropian do të bëjë bashkë liderët evropianë dhe do të jetë një mundësi për Shqipërinë në procesin e integrimit dhe të forcimit të institucioneve demokratike. Po ashtu, është një mundësi për të diskutuar mbi të ardhmen e rajonit dhe për të thelluar bashkëpunimin me vendet e tjera të Komunitetit Politik Evropian. Samiti i mëparshëm i Komunitetit Politik të Evropës u mbajt në Budapest më 7 nëntor, në drejtimin e presidentit hungarez, Viktor Orban. Më herët ishte diskutuar mundësia e mbajtjes së këtij samiti në datën 9 maj, për të cilën partitë e vogla ngritën pretendimin se do të ndikonte në rezultatin e zgjedhjeve parlamentare, të cilat do të zhvillohen më 11 maj, duke i propozuar presidentit shqptar, Bajram Begaj datën 4 maj për zhvillimin e zgjedhjeve. Katër ditë më parë, presidenti Begaj dekretoi datën 11 maj 2025 për zgjedhjet parlamentare. Në argumentimin e tij për këtë datë, ai theksoi se, institucioni i presidencës ka marrë dakordësinë nga ndërkombëtarët që takimi i Komunitetit Politik Evropian të mbahet pas 11 majit. Kreu i shtetit shqiptar zhvilloi takime në Presidencë me të gjithë aktorët politikë, por u refuzua nga opozita, duke i konsideruar si farsë ato konsultime, pasi sipas saj, Begaj e kishte caktuar datën e zgjedhjeve me urdhër nga kryeministri Edi Rama.