Lajmet e fundit
Mijëra protestues dolën në rrugët e qyteteve të mëdha anembanë botës të shtunën duke kërkuar fundin e gjakderdhjes në Gaza dhe më gjerë, ndërsa fillimi i luftës së Izraelit në enklavën palestineze po i afrohet përvjetorit të saj të parë.
Rreth 40 mijë demonstrues pro-palestinezë marshuan në qendër të Londrës, ndërsa mijëra u mblodhën gjithashtu në Paris, Romë, Manila, Cape Town dhe New York City, raporton Reuters, transmeton Klankosova.tv.
Demonstrata u mbajtën gjithashtu pranë Shtëpisë së Bardhë në Uashington, duke protestuar ndaj mbështetjes së ShBA-së për aleatin e saj Izraelin në fushatat ushtarake në Gaza dhe Liban.
Gjakderdhja e fundit në konfliktin e vjetër izraelito-palestinez u shkaktua kur militantët palestinezë të Hamasit sulmuan Izraelin jugor më 7 tetor 2023, duke vrarë 1200 njerëz dhe duke marrë rreth 250 pengje, sipas të dhënave izraelite.
Sulmi i mëpasshëm ushtarak i Izraelit në Gaza ka vrarë rreth 42 mijë palestinezë, sipas ministrisë së Shëndetësisë të Gazës. Ajo gjithashtu ka zhvendosur pothuajse të gjithë 2.3 milionë banorët e enklavës, ka shkaktuar një krizë urie dhe ka çuar në akuza për gjenocid në Gjykatën Botërore, gjë që Izraeli e mohon.
