Përmirësohet cilësia e ujit të Liqenit të Badocit, Rama: Së shpejti qytetarët mund ta përdorin për pije

Cilësia e ujit në Liqenin e Badocit, është pëmirësuar dukshëm. Kështu ka bërë të ditur kryetari i Prishtinës Përparim Rama. Rama tha se qytetarët brenda pak ditësh do të mund ta përdorin për pije. "Ju lutem të keni edhe pak durim, ndonëse e kuptoj shqetësimin që ju keni, sepse z.Fetahu më siguroi që shpejt mund ta konsumojmë ujin sepse tashmë nivelet e manganit në të janë ulur dhe vetëm duhet zbatuar disa procedura të nevojshme që më pas ta përdorim ujin lirshëm për pije", tha Rama. Që disa javë, me rekomandim të Institutit Kombëtar të Shëndetësisë Publike të Kosovës, është ndaluar përdorimi i ujit të Liqenit të Badovcit për pije për shkak të nivelit mbi normat e lejuara të manganit.